Шаҗна үүлдәчнр Кызылд цуглрхмн

Сегодня, 12:49 | Общество, Таңһчин зәңгс, Зіњг

Бурхн-шаҗна үүлдәчнрин нарт-делкән дөрвдгч ик хург Тыва Республикд болхмн. Тер ик керг-үүлдврт Элст балһсн бас экләд белдҗәнә. Хотл балһсна һардврин толһач Лиҗикә Алдр Кызыл балһсна һардач Айдын Сарыгларла көдлмшч селвлцә давулв.
Эн җилин ноха сарин 17-ас авн 20 күртл ах-дү республикд бурхн-шаҗна үүлдәчнрин нарт-делкән дөрвдгч хург болхмн.
Делкән олн орн-нутгас Бурхн Багшин номд шүтдг әмтнә элчнр, йосна, шаҗна, номин үүлдәчнр Кызылд цуглрҗ ирхмн. Шажна үүлдәчнрин ик хургт кегдҗәдг белдврин тускар Кызыл балһсна һардач келҗ өгв. Оюни эн ик харһлтын йовудт шаҗна үүлдәчнр, номтнр Бурхн Багшин ном цәәлһҗ тархалһна төрмүдәр тоолврарн хувалцҗ, өдгә цага бәәдлд хамцу үүлдврин зураһан батлҗ авхмн.
Давсн җилд Элстд болсн бурхн-шаҗна үүлдәчнрин һурвдгч нарт-делкән хург бүрдәлһнә дамшлтарн Лиҗикә Алдр хувалцв. Хальмгин хотл балһснд делкән һучн тавн орн-нутгин элчнр цуглрсмн. Бурхн-шаҗна номин делгрлтин туск номин сүүрмүд бүрдәгдсн деерән шаҗна болн йосна үүлдәчнрлә, номтнрла харһлтс кегдҗ, ирсн гиичнр Хальмг Таңһчла, хотл балһсна һәәхмҗтә тоотла таньлдхднь туслсн кесг керг-үүлдвр күцәгдлә. Хальмгин тууҗла болн сойлла таньлдх гиичнр үүдәгч коллективсин концертст орлцад, музейд болн сойлын нань чигн бүрдәцст одад, сул цаган давулсмн. Миңһәд улсиг хамцулсн ик чинртә эн хургин нань чигн керг-үүлдврмүдин тускар Лиҗикә Алдр үүрмүдтән келҗ өгв.
«Бурхн-шаҗна үүлдәчнрин хург делкән олн келн-улсиг цааранднь чигн негдүлҗ йовхнь байрта, - гиҗ Элст балһсна һардврин толһач келнә. – Тыван үүрмүдлә эн төрәр кегдсн күүндвр соньн болн туста болв. Кергтә болхла эн күүндврмүд цааранднь чигн кегдҗәхмн. Кызылд болх ик хургт шаҗна үүлдәчнр, номтнр болн нань чигн олн үүлдәчнр Бурхн Багшин номиг делгрүллһнә халхар, эн номин ул деер олн улсиг хамцуллһна тускар цугтад туста күүндвр кеҗ, цаарандк үүлдврин төлә чик хаалһ темдглҗ авхнь маһд уга».
УШКАНА Сувсн

Видео