Таңһчин ик сурһулин номтнриг ачлв

Сегодня, 12:49 | Общество, Таңһчин зәңгс, Зіњг

Әрәсән номин Өдрт нерәдсн байрин хург лу сарин 10-д Хальмг ик сурһульд болв. Энд цуглрсн номтнриг болн багшнриг сән Өдрләнь таңһчин залврин Ахлач Босхмҗин Гилән йөрәҗ, Хальмг ик сурһулин тәвцнь җил ирвәс өсәд йовна, терүнә ашт таңһчин экономик өргнәр делгрҗәнә гиҗ темдглв.
Баһ наста номтнрин то өсәд йовна, эдн номин кесг салврар шинҗллт кеҗ шин эв-арһс өргҗүллһнд ик тәвцән орулҗана. Ода эднә көдлмш җил болһн Хальмг Таңһчин Толһачин мөрәһәр темдглгдәд бәәх гиҗ Гиляна Герасимовна онц зааҗ, түрүн хойр мөрәг Хальмг ик сурһулин номин-үүлдврин төвин баһ наста номтнрт - биолог номин кандидатнр Увшин Алтанад болн Увшин Викторияд бәрүлҗ өгв.
Тер мет профессор Натра Аркадьд «Әрәсән ик сурһулин күндтә көдләч» болн профессор Михалян Бадмд «Хальмг Таңһчин күндтә иргн» өөдән нерд зүүлһгдҗ, Гиляна Герасимовна иткл цаасинь бәрүлҗ өгв. Хальмг ик сурһулин коллектив таңһчин Залврин Күндллһнә һашгар, доцент Даван Санл болхла Әрәсән Президентин Ханлтын бичгәр ачлгдв.
Өөдән ачлвр авсн номтнр таңһчин Толһач Хаска Батуд болн залврин Ахлач Босхмҗин Гиләнд ханлтан өргв. Таңһчин һардврин болн залврин дөңгәр хальмг вуз тиим өөдән күцәмҗд күрв гиҗ эдн келсн үгдән темдглв. Ода Хальмг ик сурһуль Әрәсән сән гисн 100 ик сурһулин тоод орҗана, Әрәсән залврин номин даалһвриг кесг салврар күцәҗәнә, диссертацин һурвн хүүв хальмг вузд көдлҗәнә.
Хальмг Таңһчин Толһач Хаска Батун болн залврин Ахлач Босхмҗин Гиләнән седвәрәр шар шаҗна хург Элстд бүрдәгдв, тернь ик бахмҗта йовдл болв, гиҗ номтнр темдглв. Әрәсән Президент Владимир Путин болн Энткг орн-нутгин премьер Нарендра Моди зөвшәлән өгснә хөөн Элстүр Бурхн Багшин әрүн тоот авч ирсмн, цуг улст тернь ик байр үүдәв. Тер ик керг-үүлдврин хөөн Хальмг Таңһчин болн Хальмг ик сурһулин нерн делкәд ик темдгтә болв. Тегәд баһчудыг номин шинҗллтд орлцуллһна көдлмшиг эдн цааранднь чигн күцәх, тернь нарт-делкән ик хургин хөөн улм өөдән чинр зүүдг болв гиҗ номтнр заав.
Цааранднь байрин хургт орлцачнриг таңһчин Улсин Хуралын (Парламентин) Ахлач Артем Михайлов болн сурһуль-эрдмин болн номин министр Александр Ким йөрәв.
Хургин йовудт Хальмг ик сурһулин «Бумбин орн» ансамбль хургт орлцачнриг билг-эрдмәрн байрлулв.
ТҮРВӘН Һуна

Видео