Мана цергчнрт килмҗән тусхаһад

Сегодня, 14:17 | Общество, Таңһчин зәңгс, Зіњг

«Негдсн Әрәсә» партин седвәрәр мана орн-нутгт Төрскән харсачин Өдр угтад, цергә шишлң керг-үүлдврт орлцачнрт буйнч седкләсн дөңгән күрглһнә керг-үүлдвр зарлгдв. «Ах үйин улс» гидг төсвин йовудт бүрдәгдсн «Баатрмудан дулалхин туст» керг-үүлдвр лу сарин 2-ас авн 23 күртл таңһчин район болһнд болн Элст балһснд давулгдҗана. Цергә даалһвран күцәҗ йовдг нег һазра улсин төлә ик-бичкн уга дулан хувц, хот-хол, дәәчнрт кергтә нань чигн олн зүсн кегдлмүд болн кергсл цуглулсн деерән бичгүд бичҗ йовулҗана.
Шидр Элст балһсна әмтнә социальн харслтын төвин көдләчнр эн кергт орлцад, цергчнрт дулан өөмс, хувц, удан цагт үршго хот-хол, дулалдг кергсл цуглулад, дөңнлһнә олна штабд авч ирв. Төвин һардач Ханадана Александран келсәр, Төрскән харсачин Өдрт нерәдәд, эдн нег һазра цергчнрт гертәснь белг йовулхар шиидв. Цергә шишлң керг-үүлдврт орлцҗадг дәәчнрт дөң күргсн деерән бидн эднд килмҗән тусхаҗ, әмд-менд йовхиг дурдҗанавидн. Гертәсн хол йовдг мана цергчнрт чидл-омг өгч, кергән залу-зөрмгәр күцәхд туслтха гиҗ Александра Анджаевна келнә.
Лаганя района әмтнә социальн теткврин төвин көдләчнр эн керг-үүлдврт бас шунмһаһар орлцҗ, цергчнрт буйнч седкләсн дөңгән күргҗәнә. Төвин һардач Увшан Аннан келсәр, социальн бүрдәцин көдләчнр мөңг цуглулад, дәәчнрт бас белг йовулхар белдҗәнә. Социальн көдләчнр теткҗәдг медәтнр Чимдә Раиса, Егора Инташ, Бадм-Һәрән Анна, Егора Таисия, Контемировихнә, Нарджиевихнә болн Камневихнә өрк-бүлмүд эн кергт демән күргв, дулан өөмс өлгҗ белдв. Медәтнр баһ-саһар демән күргхәр шунҗ, цергчнрин төлә бүрдәгдсн буйнч седклин кергт шунмһаһар орлцв.
Төвин улд үүлддг «Совенок» клубин бичкдүд болхла, цергчнрт бичг бичв. Эн клубд Лагань балһсна 4-ч тойгта дунд сурһулин эклц классмудын сурһульчнр орна. Төрскән харсгч Алдр дәәнд орлцач, түрүн һардач З.Э.Джамбиновин нер эн сурһуль зүүнә, багшнр сурһульчнрт төрскнч сурһмҗ өглһнә халхар ик көдлмш күцәнә. Эн сурһулин 18 күүкн-көвүн района социальн теткврин төвин улд үүлддг умшлһна клубд болдг керг-үүлдврмүдт орлцна. Шидр эдн цергчнрт бичг бичәд, зург зурад эдниг дөңнв. «Менд, салдс, мини нерн Эмиль. Би 4-ч класст сурнав. Мана орн-нутгин цуг улс чамд иткҗәнә. Бийән хәлә, чи маднд кергтәч!» гиҗ бичкн көвүн бичҗ. Бичкн көвүд-күүкд цергә даалһвран күцәҗәдг дәәчнрт сана зовҗ, салдсмудт ханлтан өргв. Эднә бичгүд цергчнрт эрк биш күрч, эдниг урмдулх гиҗ төвин һардач Увшан Анна тоолҗана.
- Мана төвин көдләчнр цергә шишлң керг-үүлдвр эклснәс авн буйнч седклин кергт орлцҗана. Социальн көдләчнрәс үлгүр авад, мана теткврт бәәдг медәтнр болн олн үртә өрк-бүлмүд бас дөң-нөкд болхар шунна. Тууврин болн дәәнә зовлң дааҗ һарсн ах үйин улст цергчнр эднә көвүдлә болн ачнрла насарн цацу улс болна, тегәд медәтнр теднд зовҗ, өөмс өлгҗ, дулан хувц йовулна. Иим керг-үүлдврмүд баһ болн ах үйин улсиг хамцулҗ, диилврин өдриг өөрдүлҗәхиг медүлнә, гиҗ Анна Владимировна келнә.
ДООҖАН Наталья
ЗУРГУДТ: медәт Светлана Камнева цергчнрт дулан өөмс өлгҗәнә

Видео