Китдин шин җил өлзәтә болтха!

Сегодня, 13:31 | Общество, Традиции, Таңһчин зәңгс, Зіњг

Хальмг улс бүкл сардан хаврин Цаһан сарин байран темдглҗәнә, терүнә эклцнь лу сарин 18-д тусв. Тер мет Китд орн-нутгт лу сарин 17-с авн шин мөрн җилиг темдглҗәнә. Зуг эднә хаврин байр тиим удан болхш, зуг нег долан хонгт темдглгднә. Сән авъяст тохрсар, Китдин әмтн элгн-садн талан золһад, нег-негндән гиичд одна.
Китдин литәр 2026 җил мөрн җил болҗана, эднә зурхачнрин тоолврар, мөрн довтлад йовна, агчмин зуур юм оңдарулҗ чаддг җил болҗана. Тиим кевәр удан ухаһан туңһалго, маһдлго кергән кех кергтә. Хара сууһад юн болхинь күләдг улст мөрн җил дурго. Күчр-күндиг дииләд, кесг арһан сөрдг уралһ күүг мөрн дөңннә. Заңһсн талан зөрдг улст хаалһинь секнә.
Эн җил туула, бар, мөрн, ноха җилтә улс күцәмҗд күрх. Эдниг өслт, туурмҗ, түргн йовудта җирһл күләҗәнә. Болв халуч седклән невчк бәрәд бәәхмн. Хулһн, моһа, хөн, така җилтә улст адһхмн биш. Талдан әмтн цуцрхла, эднә цаг ирнә. Эдн тааста кемиг күләҗ чадна, цугинь дигтә-даратаһар тоолна. Үкр, лу, мөчн, һаха җилтә улс болхла җирһлин таалд иҗлдәд бәәхәр седнә. Кемр эдн цагин селгәнд дурго болдган уурад, терүг һардхла сән ашт күрәд бәәхнь лавта. Китд зурхачнр тиим тоолврта.
Одахн Китдин шин җилд нерәдсн керг-үүлдвр Амр Санана нертә дегтрин саңд болв. Энүнд Хальмг ик сурһулин оютнр болн багшнр, дегтрин саңгин көдләчнр болн һардвр орлцҗ ирсн улсиг шин җиллә йөрәв. «Китдин Өвр Моңһлын ик сурһулин седвәрәр мана хальмг вузин медлд Конфуцийин күрәлң секгдлә. Энд Элстин сурһульчнриг, цуг улсиг китд сойлла болн келнлә таньлдулна. Одахн Хальмг ик сурһулин һардвр болн багшнр китд келнә нарт-делкән хургт һарч йовла, терүнд 60 орн-нутгас 2 миңһн багш болн номт орлцв. Китд орн-нутгт әмтн өр-өвч, цаһан седклтә, күн болһнд оньган өгхәр седнә, эдн хальмг улсла әдл заң-бәрцтә гиҗ келҗ болҗана. Китдин ик сурһульмудла бидн хамцу кесг төсв күцәҗәнәвидн. Моһа сарин нег шинд мана оютнрин баг Китд орн-нутгур келнә медрлән гүүдүлхин төлә һарч йовҗана», - гиҗ Хальмг вузин һардачин дарук Конин Оксана темдглв.
Тер мет китдин шин җиллә олна үүлдәч Пүрбән Олег йөрәв. «Тадн цугтан бат эрүл-менд, хөв-кишгән эдлҗ маңна тиньгр бәәтн гиҗ дурдҗанав. Би цөөкн җил хооран Бееҗнд шин җилин нәәрт одлав, хойр долан хонгт бәәләв. Йир ик кемҗәтә нәр-наадн болв, китдин хотл балһснд нанд цугнь таасгдв, әмтн нег-негндән йир ээлтә, элгн-садндан, үүрмүдтән кесг белг белглнә. Китд орн-нутгт бәәлһн нанд нег илвтә юмн болҗ медгдв», - гиҗ олна бүрдәцин элч келв.
Эн керг-үүлдвр «Улан панрмуд хөв-кишг өөрдүлнә» гидг нертәһәр болв. Китд оютнр Шин җилин авъясин тускар тодрхаһар келҗ өгв, видеофильм үзүлв, цәәһин керг-үүлдвр ямаран болдгинь цәәлһв. Манҗин Эмбан нертә «Герл» ансамблин бичкдүд китд би биилв.
- Китд кел дасхин төлә Карснодарин краяс ирҗ Хальмг ик сурһульд орлав. Минь гидг кезәңк цагин шүлгчин үүдәвриг эн байрт умшҗ өгләв. Йиртмҗ үвлин хөөн яһҗ сольгддгин, хавр яһҗ ирдгин тускар шүлгт келгдҗәнә. Келнә медрлән гүүдүлхин төлә Китдүр хамдан сурдг үүрмүдтәһән хамдан одлав, тернь йир туста болн соньн дамшлт болв. Хальмг ик сурһульд ирҗ суртн гиҗ баһчудт үрвр кеҗәнәв, - гиҗ Хальмг ик сурһулин оютн Анастасия Мироненко келв.
Тер мет Элстд хальмг вузин оютнрла болн багшнрла хамдан китд шин җил тосҗахдан ик байрта бәәхән Хальмг ик сурһулин медлд үүлддг Конфуцийин нертә күрәлңгин китд һардач Ван Цзяньцзюнь иткүлв. «Хальмг Таңһчин сойлла таньлдув, кесг керг-үүлдврт орлцув, тер мет Конфуцийин күрәлңд оютнрла хамдан китд сойлд болн сурһульд нерәдсн керг-үүлдвр күцәсндән ик байрта бәәнәв, мана нөкцлт өргҗәд бәәх гиҗ бат ицгтә бәәнәв», - гиҗ күрәлңгин һардач товчлв.
ТҮРВӘН Һуна

Видео