Шаҗна зааврта хураңһу

Бурхн Багшин Алтн сүмд шаҗна туск медрл тархалһнд, тер тоод шаҗна медрлтә дегтрмүд белдҗ барллһнд зөвтә оньган өгнә. Шидр энд белдгдсн дарани нег шаҗна дегтр барас һарв. XVIII зун җилин нер туурсн гүн номин үүлдәч болн багш Дже Кунтан Тенпи Дронме цагтан заавр болсн кесн тоот терүнд орв. Иигәд «Шаҗна номин зааврмуд» Бурхн Багшин номар соньмсчадг улсин оньгт тусхагдв.
Дже Кунтан Тенпи Дронме долан настаһасн авн хурлын ах багшин хүвлһн гиҗ зарлгдсн бәәҗ. Дрепунг Гоманг хурлын ик сурһульд шаҗна сурһаль эн дассмн. Шаҗна эн үүлдәч кесг кел болн бурхн-шаҗна дегтрмүд меддгәрн, нәрн ямаран чигн төрәр цәәлһвр өгч чаддгарн нер һарсн болдг. Эн гүн ухатлын шаҗна номин цәәлһвр болн зааврмуд номтнр дунд өөдәнәр үнлгдҗ, олн дунд ик тааслт олсмн.
«Шаҗна зааврмудын хураңһу» шаҗна номин цәәлһвр диглҗ хурагдсн дегтр болҗана. Бурхн-шаҗна ном даслһнд эннь йир туста зааврмуд болҗана. Оюни медрлин хаалһд орҗадг улст эннь нег үлү ик чинртә дөңцл болҗана.
Шаҗнд шүтдг улсас нань талдан улст чигн эн хураңһу соньн болхмн. Гүн медрлтә шаҗна үүлдәчин зааврмудын туснь йир ик.
УШКАНА Сувсн