Сурһмҗлгчин күндтә нерән иткүлҗәнә

Сегодня, 13:54 | Общество, Таңһчин зәңгс, Зіњг

Эн җил моһа сарин 2-т сурһмҗлгчин Өдр түрүн болҗ темдглҗәнәвидн. Тер байрин өдр Әрәсән Президент Владимир Путинә зәрлгәр 2025 җилин мөрн сарин 1 шинд батлгдла. Сурһуль-эрдмиг, шин эв-арһсиг, номиг делгрүллһн эндр өдр мана орн-нутг ик чинр зүүҗәнә. Баһчудт шин эрдм дасххин төлә, тедниг күч-көлсч коллективин үүлдврт түргәр орлцулхин төлә сурһмҗлгчнр үүлдҗәнә, теднә ач-тусинь орн-нутгт өөдәнәр үнлнә, теднә җисәг өргҗүлхин төлә кесг керг-үүлдвр күцәгдҗәнә. Тер тоод эдниг «Сурһмҗллһна кергиг сәәнәр күцәснә төлә» гидг темдгәр ачлна.

«Сурһмҗлачин эрдм- энтн онц чинртә, дааврта керг мөн. Эндр өдр эдн бичкдүдт болн арвтнрт, оютнрт өдгә цагин сурһмҗ өгч, ик туста көдлмш күцәҗ, тедниг мана орн-нутгин тууҗла болн сойлла таньлдулҗана. Эдн дааврта иргнмүдиг болн төрскнч седклтә улсиг өскчәнә», – гиҗ Әрәсән гегән-герлин министр Сергей Кравцов темдглв.
Мана Хальмг Таңһчд кесг сурһмҗлгчнр баһ наста мергҗлтнрт нөкд болҗ, сурһульчнрт болн оютнрт көдлмшч эрдмин туст бат медрл өгнә.
Эднә тоод Элстин политехникин колледжин багш Хурдан Ольга (зургт) йовна. Түүнә һардврт колледжд ирсн баһ наста багшнр, урчнр-эрдмчнр түрүн дамшлт авна, эврәннь мергҗлтән өөдлүлнә, кергән дигтә-даратаһар күцәдгиг дасна. «Мини һардврт оютнр улм нәрн керг, кесг эв-дов керглдг көдлмш күцәдгиг дасна, тер дамшлт эднд мергҗлтән цааранднь түргәр өөдлүлх арһ өгнә.
Сурһулин цаган тустаһар олзлтн, шин медрл авхар, шин эв-арһсиг дасхар шунтн, тиим әмтиг өөдәнәр үнлнә, эднә төлә көдлмшин сән таал тогтана. Мини үгд эдн орна, кесг марһанд орлцхар седнә, тиигҗ эдн мергҗлтән өөдлүлнә. Шин эв-арһ даслһна халхар эднд кезә чигн дөңгән күргнәв, селвгән өгнәв», - гиҗ Ольга Александровна эврәннь кергин тускар келнә.
Колледжин талдан эрдмчнрлә хамдан «Эрдмч» гидг таңһчин болн Әрәсән марһанд оютнран белднә. Ольга Александровна эндрк өдрин неквриг сәәнәр меднә, кесг марһанд орлцна. Тегәд чигн сурһульчнрнь кезә чигн нүүрлгч орм эзлҗ дииләчин нер зүүнә.
Эндр өдр кесг авъясиг шинәс сергәҗәнәвидн. Тер тоод сурһмҗлгчин үүлдврин чинринь цааранднь делгрүлҗ хадһлх зөвтәвидн. Тиим көдлмшин төлә ирлцңгү таал тогтах кергтә, гиҗ сангдна. Хурдан Ольган дааврта кергнь күцәмҗтә, үлгүр-үзмҗтә болтха гиҗ дурдҗанавидн.
ТҮРВӘН Һуна

Видео