Хальмг тег – соньн зургудт

Сегодня, 12:24 | Общество, Таңһчин зәңгс, Зіњг

Давсң басң өдрлә хальмг тууҗин болн авъясин туск соньн күүндвр болв. Түүнд костюмин болн пластикин таңһчин театрин һардач Татьяна Милованован үүдәсн соньн зургудын альбомин тускар Хальмг филармоня билг-эрдмин салврин ахлач Ольга Дедникова болн нертә зурач Бадендән Сергей тодрхаһар келҗ өгв.

- Кезәнә хальмг сегәтнр, нойд-хан улс теднә өөрхн болн йирин әмтн яһҗ бәәснә туск бәрмт цаасн, зургуд уга. Тер цагт зург цокдгиг нам медҗәсмн уга. Тер дуту-дундыг чиклхәр шиидләвидн. Театрин үүлдврин йовудт түүнә һардач Татьяна Милованова кезәңк бәәдл-җирһлд нерәдсн цөөкн зургуд цокч авчала. Тернь намаг соньмсулв. Чинрнь сән, мана тууҗиг дигтәһәр, сәәнәр тодлулна. Кезәңк хувцта хальмг улс-мана өвкнр йирин кергән күцәҗәнә - хүрмд белдҗәнә, шин бүүртән ирҗ герән босхчана, нань чигн көдлмш кенә. Тегәд Татьяна Алексеевнад тиим зургудас альбом тогтах селвгән өгләв, тиигҗ «Хальмг тег» гидг альбом үүдлә, – гиҗ брифингин йовудт Бадендән Сергей келв.
Тер мет Татьяна Милованова болн Ольга Дедникова күүндврт орлцҗ, альбомин тускар соньн кесг тоот келҗ өгв. Театрин артистнр, эднә элгн-садн, үүрмүднь зург цоклһнд, мана өвкнрин бәәдл-җирһл үзүллһнд орлцв. Нарт- делкән шар шаҗна ик хургт орлцачнр альбомар икәр соньмсад, хальмг улсин кезәңк бәәдл-җирһллә таньлдҗ, тер белгән делкән кесг орн-нутгт авч йовв. Альбомин презентац моһа сарин 3-д Хальмг филармоня герт болхмн.
ТҮРВӘН Һуна

Видео