Тавн үрндән үлгүр болад

07-03-2026, 11:33 | Общество, Таңһчин зәңгс, Зіњг

П.Жемчуевин нертә таңһчин эмнлһнә өдрәр үүлддг әңгиг һарддг эмч Оҗан Делгр тавн үртә эк мөн. Өдр болһн кех-күцәх көдлмш болн гер-бүүрин керг чилхш, тер бийнь Делгр Анатольевна хамдан көдлҗәдг үүрмүдтән, өрк-бүлдән болн элгн-садндан килмҗән тусхаҗ, олнд туста болхар зүткнә.
- Би зурһатадан гемнәд, селәнә эмнлһнд орхларн эмч болхар шиидәд, тер цагас авн зуг эн эрдмин тускар ухалдг биләв. Медицинск колледж төгсәснә хөөн Әәдрхн балһснд ик сурһульд сурад, күч-көлснә хаалһан эклләв. Мана өрк-бүлд авальм болн хадм экм бас эмчнр, ууһн Аюна күүкмдн Москвад медицинск ик сурһульд сурчана. Өөрхн элгн-садн дунд бас эмчнр олн бәәнә. Көдлмшин хөөн цогц-махмудан батрулнав, йовһар йовнав. Асхни серүнд балһсна уульнцст цевр аһар киилснә хөөн өдр-бүрин төрмүд мартгдна. Эңкр боксин, Дорҗ-Һәрә сул бөк бәрлдәнә секцд орна. Камила англь келәр соньмсна, отхн Сувсана ода деерән бичкн, эн һунта, - гиҗ Делгр Анатольевна келнә.
Экнь Светлана Санджиевна күүкндән бичкнәснь авн үүл бәрдгиг дасхад, эдн хамдан хатхмр хатхад, олн зүсн кегдлмүд кедг бәәсмн. Ода тавн үртә эк эврәннь күүкдтән цугинь зааҗ өгнә, эдн хамдан олн зүсн хот-хол белднә. Хадм экнь Любовь Байраевна сән берлә харһсндан байрлҗ, ачнран асрхд дөң болна. Максим көвүнь авальтаһан хөрн җилдән кен-негнәннь седкл медҗ, ниитә бәәнә.
«Күцәмҗ бәрхин тускар ухалтн, нег-негндән итклтә түшг болтн гиҗ күүкдтән селвг өгнәв. Олн үртәв гиҗ герин көдлмшт даргдлго эрдмин халхар мергҗлтән өөдлүлҗ, эмнлһ авчадг улст дөңгән күргҗ, үүрмүдән урмдулҗ көдлнәв», гиҗ олн үртә эк тоолна.
Сән өдрмүдин байрла эднә герт шуугата болна, бичкдүд эврә һарарн белгүд кенә, билг-эрдмән үзүлнә, Делгр хадм эктәһән хоюрн сенр хот белднә. Өрк-бүләрн цуһар ширә эргәд сууһад, цаган сергмҗтәһәр давулна.
ДООҖАН Наталья

Видео