Таңһчин сән гисн күүкд улсиг ачлв

07-03-2026, 12:22 | Общество, Таңһчин зәңгс, Зіњг

Күүкд улсин нарт-делкән Өдр угтҗ Элстд таңһчин райодт болн хотл балһснд үүлддг күүкд улсин хүүвмүдин хург болв. Эн керг-үүлдвр Хальмг Таңһчин күүкд улсин ниицәнә седвәрәр бүрдәгдв. Ик хургт Төрскән харсгч Алдр дәәнә ветернамуд, таңһчин делгрлтд ик тәвцән орулсн күүкд улс болн цергә шишлң керг-үүлдврт орлцачнрин экнр, олна бәәдл-җирһлд шунмһаһар орлцдг седвәртә, шунлтта күүкд улс орлцв. Әрәсән улсин ниицлтин җиллә мана таңһчд бәәдг олн келн-улсин элчнр бас эн хургт орлцснь темдгтә болв.
Эндр таңһчин күүкд улсин ниицәнә ханьд 4 миңһн һар күн орна, районд болһнд олна бүрдәцин әңгүд үүлднә. Эдн бәәсн һазриннь делгрлтд, дорас өсч йовдг бичкдүдт төрскнч сурһмҗ өглһнд ик тәвцән орулҗ, кесг керг-үүлдврин седвәр татҗ олнд үлгүр-үзмҗ болна. Хургт орлцачнрин оньгт күүкд улсин ниицәнә гешүдин кегдлмүдин һәәхүл тусхагдснь эдн дунд билгтә, һартан өөтә улс бәәхиг герчлв.
Хальмг Таңһчин күүкд улсин ниицәнә ахлач Эсклянә Данара хургт орлцачнриг йөрәһәд, эн җил намрар Әрәсән күүкд улсин ниицән 85 җилин өөнән темдглх хооран гив. Мана таңһчд олна ниицән 23 җил бүрдәгдсмн, җил ирвәс терүнә гешүдин то өсәд йовхнь, баһчуд теднә зергләнд орҗ олна бәәдл-җирһлд орлцҗ, төрскн һазр-уснаннь делгрлтд тәвцән орулхар шунҗахиг темдглв. Мана таңһчн күүкд улс билгтә, седвәртә, сәәхн, цаһан седклтә болн үнн чик хәләцтә, гиҗ Данара Босхомджиевна йөрәлин үгдән келв.
Хальмг Таңһчин залврин Ахлач Босхмҗин Гилән таңһчин күүкд улсин олна ниицәнә гешүдиг өөрдҗ йовх сән өдрин байрла йөрәһәд, цергә шишлң керг-үүлдврт орлцачнрин экнрт болн авальмудт онц ханлтын үг келв. Эк, экин килмҗ, өрк-бүл Төрскндән хару улсиг асрҗ, зөрмг улсин улд бәәнә гиҗ таңһчин залврин Ахлач темдгләд, Әрәсән күүкд улсин ниицәнә ачлврмуд бәрүлҗ өгв. Тиигәд, Әрәсән Баатр Очр-Һәрән Нарна эк Кульменә Любовиг «Эк-эцкин туурмҗин одн» (зургт), таңһчин олна бәәдл-җирһлд шунмһаһар орлцдг күүкд улсиг В.С.Гризодубован болн «Төрскнә күүкдт» гидг медаляр ачлв. Хальмг Таңһчин Улсин Хуралын (Парламентин) Ахлач Артем Михайловин даалһврар депутат Мацга Татьяна седвәртә күүкд улсиг бас ачлад, мана таңһчин эрүл-менд харлһна, сурһуль-эрдмин, сойлын, экономикин болн нань талдан халхст күцәмҗтәһәр үүлддг күүкд улс олнд үлгүр болдгиг темдглв.
Таңһчин күүкд улсин олна бүрдәцин райодт үүлддг әңгүдин гешүд билг-эрдмән үзүлҗ, байрин концертд ду-бииһән үзүлв. Күүкд улсин сән өдр угтҗ болсн байрин харһлт цааранднь төрскн һазр-уснаннь делгрлтин төлә шунмһаһар үүлдхд ик урмдта болв.
БАТАН Сәәхлә

Видео