Улсин көтлврин төсв белдҗәнә

Сегодня, 14:19 | Общество, Таңһчин зәңгс, Зіњг

Шидр Элстд «Негдсн Әрәсә» партин тооцана хург болв. Терүнд таңһчин күцәгч, зака үүдәгч йосна болн бәәрн залврин бүрдәцсин, олна ниицәсин элчнр орлцад, тавн җилин эргцд партин улсин көтлвр күцәлһнә аш диглҗ, шин көтлврт орх төсвсин тускар күүндв. Партиг дөңнлһнә олна штабд болсн харһлтд цергә шишлң керг-үүлдврт орлцачнриг болн теднә өрк-бүлмүдин гешүдиг дөңнлһнә төрәр күүндвр болв. Хальмг Таңһчин залврин Ахлачин дарук –таңһчин социальн делгрлтин, күч-көлснә болн көдлмшәр тетклһнә министр Өлзәтин Марина болн СВО-н ветеранмудын ниицәнә ахлач, ЭГС-ин депутат Чумуда Николай харһлтыг һардҗ давулв.
Түрүләд Өлзәтин Марина мана таңһчд цергә шишлң керг-үүлдврт орлцҗадг нег һазра улсиг дөңнлһнә туск керг-үүлдврмүдин тускар зәңглв. Тиигәд, таңһчд цергчнрин болн теднә өрк-бүлин гешүдин төлә онц зөвтә 30 керг-үүлдвр күцәгднә. Эдн социальн бооцана көтлврт, «Агромотиватор» төсвд орлцҗ, шаңһа дөңгәр эврә керг бүрдәнә. Тиигәд, ода 9 ветеран социальн бооца батлад, тааста кергән делгрүлҗәнә. СВО-н ветеранмуд таңһчин олна бәәдл-җирһлд шунмһаһар орлцна, дорас өсч йовдг баһчудт төрскнч сурһмҗ өглһнд тәвцән орулна. Удл уга дәәнә ветеранмудын госпиталь үүлдврән эклхмн, райодын эмнлһст бат ясвр кегдхмн, тегәд цергә керг-үүлдврт орлцачнрт сән чинртә медицинск дөң күргҗ, эднә эрүл-менд батруллһнд ик оньг тусхагдҗана. Өөрхн иргчд госпиталин дәкәд нег әңгин тосхлт эклхмн. Әрәсән Президентин даалһврар «Баатрмуд 08» көтлвр сән йовудтаһар күцәгдҗәнә, терүнд орлцачнр таңһчин бүрдәцст дамшлт хоршаҗ, иргчдән дааврта үүлд батлгдад, төрскн һазриннь делгрлтин туст арһ-чидлән нөөлго көдлхмн. Марина Петровнан келсәр, орн-нутгин болн региона күцәгч йосна, бәәрн залврин бүрдәцсин болн олна ниицәсин элчнр, арһлачнр цергә керг-үүлдврт орлцачнрт дөң-тусан күргх зөвтә. СВО-д орлцачнриг көдлмшәр тетклһнә, шин эрдм даслһна, мергҗлтән өөдлүллһнә, санаторн-курортн эмнлһнә болн эрүл-мендән батруллһна, бичкдүдт төрскнч сурһмҗ өглһнә төрмүдиг хаһлхин төлә цуһар күчән негдүлҗ, хамцу үүлдх зөвтә гиҗ дааврта һардач темдглв.
Чумуда Николайин келсәр болхла, цергә шишлң керг-үүлдврт орлцачнриг шаңһа демин, һазрин әңг һарһҗ өглһнә төрмүд үүмүлнә, тегәд улсин көтлврт эднә зөв харслһна керг-үүлдврмүд эрк биш орулгдх зөвтә болҗ һарна. Улсин көтлврт ямаран төрмүдт һол оньг өггдхиг бидн эврән дигләд, сүв-селвгән орулҗ терүг белдлһнд орлцхмн гиҗ ветеран дуудвр кев.
Харһлтд орлцачнр баг-багар хувагдҗ, ветеранмудыг дөңнлһнә онц зөвин керг-үүлдврмүдин туст селвгән орулҗ, улсин көтлврт орулх төсвс белдв. Үстин района муниципальн бүрдәцин депутатнрин Хургин депутат, СВО-н ветеран Лиҗин Баатр нидн «Агромотиватор» төсвд орлцад, эн җил шаңһа дем авад, крестьянск-фермерск эдл-аху бүрдәх саната бәәнә. Энүнәс нань эн Иҗл һолын көвәд глэмпинг тосхлһна төсв күцәлһнә көтлврт бас орлцхар зуралҗана. Кемр эн төсвин йовудт шаңһас мөңг йилһхлә, әмтн амрхин төлә гермүд тосхад, сән таал тогтах санаһан медүлв. Таңһчин әмтн энд амрч чадх, бәәрн улс болхла көдлмштә болх гиҗ ветеран тоолҗана.
Садовое селәнд бәәдг Сергей Дудкин бас цергә шишлң керг-үүлдврт орлцад, залу-зөрмгән үзүләд «Зөргин төлә» медаляр ачлгдсмн. Эн урднь арвн долан җилин эргцд электрокүчнә бүрдәцд көдлсмн. Цергә керг-үүлдврт шав авсна хөөн эн эрдмәрн көдлдг арһ уга болв, ода көгшн эцкән хәләҗәнә. Ветерана тоолврар, таңһчд санаторн-курортн эмнлһ авлһна туст сән таал тогтах кергтә. Октябрьск района эмнлһнә ах эмч, таңһчин Улсин Хуралын депутат Элдән Виктор цергә керг-үүлдврт орлцачнриг эмәр тетклһнә төр улсин көтлврт онц темдглх кергтә гив.
Өлзәтин Марина харһлтыг ашлад, күүндвр соньн болсиг темдглв. Цергә керг-үүлдврт орлцсн улсиг көдлмшәр тетклһнә, эднә эрүл-менд батруллһна, төрскнч сурһмҗ өглһнә төрмүдәр орулгдсн сүв-селвгүд улсин көтлврт эрк биш зөвтә орман эзлх гиҗ Марина Петровна келв. Хальмг Таңһчин Улсин Хуралын (Парламентин) Ахлач Артем Михайлов болн Әрәсән Федерацин гешүн Байир Путеев эн талвңд соньн харһлт болсиг темдглв.
ДООҖАН Наталья

Видео