Хотл балһсан кеерүлхәр

Сегодня, 14:50 | Общество, Таңһчин зәңгс, Зіњг

Шидр Элст балһсна Олна палатын шин хань бүрдәгдәд, түрүн сүүр давулгдв. Хальмг Таңһчин Толһачин һардврин ахлач Кирилл Попов, Элст балһсна Хургин Ахлач Максим Сорокин, Элст балһсна һардврин толһачин негдгч дарук Кальдинә Борис, таңһчин Олна палатын ахлач Мучан Батыр, хотл балһсна прокуратурин, дотр-дундын кергүдин болн олна бүрдәцсин элчнр сүүрт орлцв.
Элст балһсна Хургин Ахлач Максим Сорокин харһлтыг нүр үгәр секәд, мана таңһчин хотл балһсн делгрәд, җил ирвәс ясрад бәәх зөвтә гив.
–Мана баһчуд төрскн һазртан көдләд, таңһчин цецгәрлтд тәвцән орулхар зүткхин төлә энд сән кец-таал тогтах кергтә. ЭГС-ин депутатнр болн хотл балһсна һардвр олна бүрдәцслә хамдан үүлдҗ, балһсна делгрлтин халхар олн зүсн төсв күцәҗәнә. Тиигәд, сүл җилмүдт Элстд депутатнрин саң бүрдәгдв, балһсна әмтнә седвәр дөңнлһнә кесг төсв бәәдл-җирһлд тохрагдҗана. Үлгүрнь, эн җил әмтнә седвәрәр Элстд 27 талвң тосхгдхмн, теднәснь 14-нь - бичкдүдин садмудт, дәкәд 4-нь - дунд сурһульмудт. Элст мана таңһчин хотл балһсн болна, давсн җилин намрар бурхн-шаҗна нарт-делкән ик хург давулгдснь бидн ик чинртә керг-үүлдврмүд бүрдәҗ чаддгиг герчлв. Бидн цуһар арһ-чидлән негдүләд, эңкр балһсна делгрлтин төлә хамцу үүлдх зөвтәвидн, - гиҗ Максим Сорокин темдглв.
Балһсна Олна палатын хань һурвн җилин эргцд үүлднә, терүнд 15 элч орна. Элст балһсна һардвр болн балһсна Хург таваһад кү терүнд орулна, наадк тавн күн олна ниицәсин болн бүрдәцсин элчнр мөн. Шин ханин түрүн сүүриг хамгин медәтә гешүн давулдг авъяста, тегәд хотл балһсна делгрлтд ик ач-тусан күргсн Валентина Малиевад ирлцңгү күндтә зөв өггдв. Элст балһсна Олна палатын ахлачин үүлд Нарна Викторин кандидатуриг батлх селвг орулгдсиг цугтан дөңнәд, энүг ахлачин үүлд батлв. Энүнә дарукд Кован Виталий суңһгдв. Балһсна Олна палатын гешүд Элстин әмтнә сә хәәҗ, күцәмҗтәһәр үүлдх болҗ иткүлв.
БАТАН Наталья

Видео