Ахнр-дүүнр болҗадг үүрмүдтәһән харһв

Сегодня, 12:24 | Общество, Таңһчин зәңгс, Зіњг, Сойл

Ниицлтин җил олн керг-үүлдврмүдәрн соньн болҗана. Иигәд эн җилин лу сарин 20-д Тыва Республикин сойлын министерствин седвәрәр кегдсн телехарһлтын тускар урднь бичләвидн. Шидр моһа сарин 30-д ирлцңгү керг-үүлдвр болв. Ода Хальмг Таңһч, Тыва болн Бурять: ах-дү республикүд дунд соньн күүндвр болв.
Әрәсән улсин ниицлтин җилин эклц болсн, бурхн-шаҗна үүлдәчнрин дөрвдгч нарт-делкән хург угтҗ кегдсн тер күүндврин йовудт Тыван болн Хальмгин орлцачнр Цаһан Сарин болн Шагаан байрин тускар тоолврарн хувалцв. Келн улс болһна хаврин байрин туск тууҗ болн авъясмуд цугтад соньн болв.
Тер түрүн харһлтын йовудт «Төрскн һазран дуундан орулҗ магтнав!» гидг нертәһәр үүдәгч марһан зарлгдсн билә. Шар шаҗнд шүтдг һурвн республикин 1-4-ч классмудын сурһульчнр терүнд орлцхмн гиҗ марһана таалд батлгдла. Тегәд ода болсн харһлтын йовудт үүдәгч эн марһана ашнь диглгдв. Марһанд һурвн зун сурһульч орлцснь ончта йовдл болв.
Бичкдүдт оюни-шагшавдын сурһмҗ өглһнә, теднә үүдәгч билгинь делгрүллһнә, төрскн келәр һарсн дегтрмүд умшлһнд туслх күслтәһәр эн марһан зарлгдсн билә. Марһана таалар регион болһн эврә жюри болн мөрәллһнә саң тогтах зөвтә бәәсмн.
Хальмг Таңһчин булң болһнас сурһульчнр марһанд орлцв. Ут тоодан 154 бичкн сурһульч марһанд эврә үүдәврмүдән илгәв. Хальмг Таңһчин сойлын болн зуульчллһна, сурһуль-эрдмин болн номин министерствс, райодын сурһуль-эрдмин заллтс, багшнрин мергҗлт өөдлүллһнә Хальмг күрәлң, хальмг келнә багшнр эн туст бүрдәмҗин ик көдлмш кесинь заах кергтә.
Сурһульчнрин билг-эрдмиг үнлсн жюриг Хальмг Таңһчин сойлын ачта көдләч, бичәч Канкан Эрднь толһалв. Жюрин ханьд орсн Келн-улсин дегтрин саңгин һардач Майя Безидеева, эн дегтрин саңгин көдләч Шаран Татьяна, багшнрин мергҗлт өөдлүллһнә Хальмг күрәлңгин ах багш Бадмин Любовь, Элстин техническ лицейин хальмг келнә багш Эльза Валетова марһана хайгар ирсн үүдәврмүдиг шинҗлҗ хәләв.
А. Амр-Санана нертә Келн-улсин дегтрин саң, К. Чуковскийин нертә Туван бичкдүдин дегтрин саң болн «Буряад-Монгол Аялга» гидг утх-зокъялын негдлт иньгллтин харһлтыг белдҗ бүрдәв.
Хальмг Таңһчин сойлын болн зуульчллһна министрин дарук Санҗрһа Герман Тыва Республикин сойлын министрин дарук, Тыва Республикин сойлын ачта көдләч В.А. Кошкар-оол, «Буряад-Монгол Аялга» гидг негдлтин һардач А. Будаев йөрәлин үг келв.
Тыва Республикин артистнр дуулсна дару Хальмгин «Теегин одн» нертә улсин көгҗмин зевсгүдин ансамбль билг-эрдмән үзүлҗ, әмтнд байр үүдәв. Билгтә бичкдүдин төвд үүлддг эн коллективиг Е. Ожелдыкова һардна.
Һол мөрә шүүҗ авсн Үлмҗин Альмина болн марһана дәкн нег дииләч Мукөвүнә Алтана эн харһлтд орлцснь тааста болв. Альмина Г. Рокчинскийин нертә Алцңһуда дунд сурһульд сурна, багшнь Н. Горяева. Мукөвүнә Алтана болхла Элст балһсна 15-ч тойгта дунд сурһульд сурна, багшнь А. Босхаева мөн.
Бадмин Серәтрин «Эк болн Төрскн», Шугран Веран «Тег угаhар би» болн «Ээҗ тег» шүлгүдиг марһанд диилвр бәрсн эн сурһульчнр йир сәәнәр, учр-утхинь даршлһинь дигтә сәәнәр медүлҗ умшснь әмтнә оньг авлв.
ХӨӨЧИН Галина

Видео