Хальмгин зөргтә баатрмудыг тодлад

Сегодня, 12:25 | Общество, Таңһчин зәңгс, Зіњг

Мана ик орн-нутгин әмтн әәмшг учрсн цагла хамцад, эврәннь һазран харсна. Тиигәд дөчн җил хооран Чернобыльск АЭС-т зеткртә йовдл болад, әмтнә әмнд күрх әәмшг учрсмн.

Эн әәмшгтә аюлас әмтиг харсн зөргтә баатрмудт нерәдсн санлын көнцерт шидр Чонкуша Петрин нертә Элстин билг-эрдмин колледжд болв. «Союз Чернобыль» олна ниицәнә ахлач Һучна Борис санлын концертиг секчәһәд, дөчн җил давсн бийнь тер әәмшгтә аюл мартгдлго бәәхин тускар келв. Күчр ик әәмшгәс әмтиг гетлҗ чадсн үүрмүдиннь тускар Һучна Борис авальтаһан дегтр белдҗ һарһсмн.
Хальмг Таңһчин Улсин Хуралын (Парламентин) Ахлач Артем Михайлов санлын концертд орлцачнрт йөрәлин бичгән илгәв. Парламентин Ахлачин дарук Нуура Николай тер йөрәлинь цуглрсн улст соңсхад умшв (зургт).
Концертин йовудт Чернобыльск АЭС-т болсн аюл зогсалһнд орлцсн баатрмудын санлд нерәдсн шүлгүд болн дуд соңсхгдв. Элст балһсна сойлын төвин күч-көлснә ветеранмудын дууна коллектив Ольга Шептухинан һардврт Төрскнә чинринь медүлгч һурвн ду дуулад, әмтнә оньг авлв. Дуучнрин ханьд Чернобыльд орлцачнрин өөрхн улс бәәхнь заагдад, ЛДПР-ин Хальмг әңгин нерн деерәс дууна коллективд белгүд бәрүлҗ өггдв.
«Бухенвальдский набат» гидг ду дахулҗ үзүлгдсн видеозурц өдгә цага иим нәрн цагт әмтн саг бәәхиг цугтад медүлсн болв. Баатрмудт шүлгүдән болн дууһан нерәдҗ, нердинь амлгдҗ бәәхлә, зөргтә үрдин туск санл мартгдшгог эннь медүлҗәнә. Чернобылин аюл зогсаллһнд орлцсн баатрмудын тускар Селгкә Валерий бичсн шүлгүдиг колледжин оютнр учр-утхинь медүлҗ умшв.
Колледжин оютнрин дууна коллектив дуулсн «Нежность» гисн дун тер цагиг тодлулад ямаран чигн әәмшгиг давҗ һарад, җирһлин йовуд цаарандан делгрлт авдгинь медүлв. Дууна коллективиг Чернобылин әәмшгиг ууруллһнд орлцсн Дукмана Пантелейин күүкн Дукмана Наталья һардҗана. Билгтә эн багшин һардврт Элст балһсна 1-ч тойгта бичкдүдин билг-эрдмин сурһульд бичкн дуучнрин дууна коллектив үүлднә.
Чернобыльск аюл болснас авн дөчн җил болҗадг өөн Әрәсәд улсин ниицлтин җил зарлгдснла ирлцҗ темдглгдҗәхнь ончта. Хальмгудас нань энд бәәдг талдан келн-улсин элчнр бас. Тегәд эн асхн оютнр «Бурзяночка» башкирск болн якутск би биилснь соньн болв. Асият Исаева «Мой Дагестан» гидг ду болн «Хальмг тег» ду хальмг келәр дуулснь әмтнд таасгдв. Хальмг Таңһчин сойлын ачта көдләч Марианна Усаева дуулсн дуд чигн әмтнә оньг авлв.
Чернобыльск АЭС-т учрсн ик әәмшгтә аюлыг ууруллһнд әмән әрвллго орлцсн баатрмудын санл күндлҗ, эндрк үйин баһчуд концерт бүрдәснь евәлтә йовдл мөн.
Мана ик орн-нутгин тууҗд мөңкрсн баатрмудын нердиг тодлулсн, теднә зөргтә үүлдвриг үзүлсн санлын концерт белдҗ давулсн Хальмгин билг-эрдмин колледжин оютнрт, цуг коллективст ханлтан медүләд, Һучна Борис колледжин һардач Эрнҗәнә Лилияд Ханлтын бичг бәрүлҗ өгв.
Ушкана Сувсн

Видео