Социальн көдләчнрин ач-тусинь үнләд

Сегодня, 12:37 | Общество, Таңһчин зәңгс, Зіњг

Таңһчин район болһнд үүлддг әмтнә социальн теткврин төвин социальн көдләчнр гемтә-шалтгта улст болн һанцарн бәәдг медәтнрт дөң-нөкд болҗ, ут нас наслҗ олна бәәдл-җирһлд орлцхиг урмдулна. Социальн көдләчнр эднд өөрхн элгн-саднла әдл болҗ, өдр-бүрин төрмүдинь хаһлҗ, эднә төлә соньн керг-үүлдврмүд давулна. Лаганя района әмтнә социальн теткврин төвин һардач Увшан Аннан келсәр, социальн көдләчнр бийснь седвәртә, шунлтта, олна нүүрт йовдг улс болна.
- Социальн халхд нурһлҗ күүкд улс көдлдгнь нуувч биш. Эдн өр-өвч седклтә, цаһан саната, ах үйин улсиг тевчдг, билгтә, бәрсән кедг күүкд улс мөн. Кех-күцәх көдлмш дала болдг бийнь эдн селәнә болн района бәәдл-җирһлд шунмһаһар орлцна. Мана төвин медлд «Шунмһа кевәр ут насллһн», «Эрүл-менд», «Социальн зуульчллһн», «Медәтнрин төлә һарин хурһдын гимнастик» болн нань чигн негдлтс үүлднә, - гиҗ Анна Владимировна келнә.
Гемтә-шалтгта медәтнр гертәсн һардг арһ уга болхла, теднд гер деернь байрин керг-үүлдврмүд бүрдәҗ сергмҗ үүдәнә. Социальн көдләчнр медәтнриг һарсн өдрләнь, ямр нег байрла йөрәҗ, билг-эрдмән чигн һарһад, белгән бәрүлнә. Өвкнриннь авъяс сәәнәр меддг, хальмг келндән хару, төрскнч седклтә социальн көдләчнр цуһар гилтә дууч-биич улс мөн, тегәд эдн медәтнрин төлә нәр-наад һарһдг деерән бийснь үүдәлтин марһаст шунмһаһар орлцна. Тиигәд, Җалһа болн Буранное селәдт үүлддг социальн көдләчнр Алдр Диилврин 80 җилин өөнд нерәдгдсн, төрскнч сурһмҗин марһасин дииләчнрин тоод орсмн.
Увшан Аннан келсәр, эн хойр селәнд ут тоодан арвн социальн көдләч бәәнә, эдн медәтнрин түрүн нөкднр болна. Саңһҗ-Һәрән Ольга, Саңһҗин Маргарита, Манҗин Ольга, Мендән Светлана, Сарңга Светлана, Бадм-Хаалһин Булһн, Церн-Увшан Ирина, Җалан Юлия болн Качан Валентина нег һазра улс дунд күндллһ олсн, седвәртә, шунлтта күүкд улс мөн. Җил болһн Җалһа селәнд бадм цецгин наадм болна, тегәд эдн хальмг улсин шимтә хот-хол белддгиг дасхна, билг-эрдмән үзүлҗ ду-бииһәрн байрлулна, гиичнриг тосад, Галсан хурлд экскурсь давулна. Сүл җилмүдт эдн цергә шишлң керг-үүлдврт орлцачнриг дөңнлһнә буйнч седклин кергт бас шунмһаһар орлцҗ, медәтнрлә хамдан дәәчнрин төлә дулан өөмс, беелә өлгнә, хот-хол болн эм цуглулҗ йовулна, - гиҗ Анна Владимировна үүрмүдиннь тускар бахтҗ келнә.
Социальн теткврин цергллтд олн җилдән үнн-чик седклтәһәр көдлҗәдг, медәтнриг болн гемтә-шалтгта улст өөдән чинртә туслмҗ күргҗ, олна бәәдл-җирһлд орлцдг социальн көдләчнрин ач-тусиг темдгләд, района, таңһчин бәәтхә, орн-нутгин ачлврмудар темдглсмн.

ДООҖАН Наталья
ЗУРГТ: Лаганя района әмтнә социальн теткврин төвин
Җалһа болн Буранное селәдин социальн көдләчнр

Видео