Хальмг ик сурһульд болсн харһлт

16-04-2026, 12:43 | Общество, Таңһчин зәңгс, Зіњг

Хальмг ик сурһулин һардач Салан Бадм Хальмгин Шаҗн Лам гевш Тензин Чойдакла харһҗ күүндв.

Харһлтын йовудт бурхн-шаҗна сурһулиг болн номиг таңһчд делгрүллһнә төрәр күүндвр болв.
Хальмг ик сурһулин, шаҗна үүлдәчнрин болн хургудын хоорнд залһлда тогталһна төр харһлтын йовудт бас хәләгдв. Шаҗна сурһулин халхар шин төсвс ухалҗ бүтәлһнә төр чигн босхгдв.
Хальмг ик сурһулин гүн номин тиңкмин профессор, доктор Улана Мергн эн харһлтын туск тоолврарн хувалцв. Хальмг ик сурһульд дорд үзгин болн бурхн-шаҗна номин халхар шинҗллтс кесгәс нааран кегдҗәнә. Эн җил немр сурһулин йир соньн көтлвр күцәгдҗәнә. Медрлән гүүдүлхд болн номин халхар дамшлт авхд эн шин төсв туслхмн. Өвкнрин медрлиг сергәҗ, тер цагт шаҗна халхар олзлҗ йовсн тоотла таньлдҗ, медрлин өдгә цага девсңд күрх керг күцәгдҗәдг болна. Оюни эн үүлдвртнь Бурхн Багшин Алтн сүм цуг халхар дөң-нөкд болхнь харһлтын йовудт медгдв.

УШКАНА Сувсн

Видео