Хурл секгдхмн

Сегодня, 12:45 | Общество, Таңһчин зәңгс, Зіњг

Баһ Дөрвдә районд хурл секлһнд белдврин көдлмш төгсч йовна.
Баһ Дөрвдә района һардврин зәңглсәр, удлго Ханата селәнд Дунд Хурл секгдх болв.
Баһ Дөрвдә района делегац Хальмгин Шаҗн Лам гевш Тензин Чойдакла харһв. Дунд Хурлын ах багш Зуңһру, энд бәәдг арвна толһач Саран Савр, бичкн баргс арвна элчнр Амика Лиҗ болн Мергн Андреев, Ханата селәнә ахлач Мемән Елена эн харһлтд орлцв. Күүндврин йовудт Хальмгин Шаҗн Лам оюни эн үүлдвр Ханатан әмтн үйнрин хоорндк залһлдаг батлҗахинь темдглв. Урднь энд үүлдҗәсн кезәңк хурлын авъясмудыг сергәһәд, Дунд Хурлд әмтн оларн ирҗ, бурхндан зальврдг бәәрн болсн деерән өвкнрин сойлын болн шаҗна зөөриг әрүнәр хадһлхмн гисн ицлән Тензин Чойдак медүлв.
Бурхн Багшин Алтн сүм цуг халхар Дунд Хурлд дөңгән күргхмн. Гелңгүд белдлһнд, шаҗна йосрхл күцәлһнд, бурхн-шаҗна медрл тархалһнд Хальмгин төв хурл эрк биш нөкд болхмн.
Дунд Хурл така сарин хойрдгч өрәлд байрин бәәдлд секгдх гиҗ зуралгдҗана. Баһ Дөрвдә района элчнр Хальмгин Шаҗн Ламд күндллһән медүлҗ, цецн ухан-тоолврта дегтр бәрүлҗ өгв.
Дунд Хурл секлһнә керг-үүлдвр хальмг улсин җирһлд ик чинртә йовдл болҗана.
УШКАНА Сувсн

Видео