Бәрсн гермүднь бәәшң болад

16-04-2026, 13:05 | Общество, Таңһчин зәңгс, Зіњг

Хальмг аавнр-ээҗнрин бичкндк болн баахн цагин тууҗ әдл болдг. Дәәнә болн Сиврт бәәсн цагт кедү зовлң дааҗ һарад, өмәрән зүткҗ, хәрү төрскн теегтән ирәд, таңһчан шинәс эдн босхв.
Җамбша (Булыкова күүкн цага нер-уснь) Галина (зургт) нег һазра улстаһан хамдан бичкнәсн авн күчр-күнд тоот үзсн мөн. Эк-эцкдән һанцхн үрн болсн Галина дахуль һурвн ахтаһан болн эгчтәһән хамдан ишкә герт бәәҗ. Үлмҗ эцкнь малан хәрүләд, өркән теҗәдг билә. 1943 җилин догшн киитн үвләр шинкн өр цәәхлә генткн салдсмуд орад ирсинь долата Галина сәәнәр тодлсн болна. Тер өдрәс авн мана өвкнрин һашута тууҗ эклв.
Булыковихнә өрк-бүл Алтан крайин Усть-Тальменск станцд тусв. Тенд эдн модн герин нег өрәлднь бәәршлв. Герин наадк хаҗуднь болхла, зөв-йос эвдсн улсиг бәрәнд орулдг бәәҗ. Района Тальменка төв селән эднәс 150 дууна һазрт бәәсмн. Модн киитн герт көөркс хувцтаһан унтад, герин тал дунд зогсчасн бешиг эргҗ дуладдг бәәсмн.
Сиврт Галина хойр класс төгсәснә дару экләд көдлв. Тенд Нина күүкнлә таньлдҗ, хамдан кеер көрә боднцг малтад, күүнә мал хәрүләд, гесндән теҗәл олхин төлә альд эс көдлсн болх гинәт! Баһ цагасн авн дигтә-дарата Галина эврә хорадан модн девскр гилвктлнь уһаһад, цевр-цер бәрдг бәәсмн. Гиҗгтә күүкн болад, мод көрәдлһнд көдлҗәһәд, нег дәкҗ унад, өвдгән шавтсан эн ода күртл мартхш.
Сиврт Галина Улюмджиевна Җамбша Александрла таньлдад, 1957 җилин үвләр баһчуд өркән өндәлһв. Күргн келсн күүкән һурвн мөртә цанар гарма татад, шуугад-ниргәд гертәснь авад һарч.
Тер җилд баахн өрк-бүл төрскн һазртан нүүҗ ирәд, түрүләд Целинн района Западный селәнд цаг зуур бәәҗәһәд, дарунь Троицкое селәнүр һарв. Нег һазра улстаһан хамдан баһчуд Хальмг Таңһчан шинәс босххар гүҗрәд көдлв.
Җамбша Галина «Калмстрой» бүрдәцин 1-ч тойгта тосхлтын заллтын багд күч-көлснә хаалһан эклсмн. Хөөннь Целинн района коммунальн эдл-ахуд шалдач-ширдәчәр көдлв. Тенд дамшлтан хоршаһад, Галина Улюмджиевна күүкд улсин шалдачнрин баг һардна. Тиигхд энүнә һардврт көдлҗәсн баг кесг дәкҗ социалистическ марһасин дииләч болҗ ончрсмн. Байрама Михаилын, Васькинә Антона, Увшин Шаран нерд таңһчин тосхлтын халхин тууҗд орснь лавта, мел эднәс Галина даңгин үлгүр авдг бәәсн мөн. Тиигәд тосхлтын халхар дөчн һар җилдән көдләд медәт ачта амрлһндан һарв.
Мана бәәдл-җирһл җил ирвәс сольгдв чигн тосхачин эрдмтә улс кезә чигн кергтә болна. Ке-сәәхн шин гермүд, сурһульмуд, бичкдүдин садмуд, талдан чигн бүрдәцс балһсд-селәдәр дүңгәҗ, олн-әмтнд байр-бахмҗ үүдәнә.
Тавн хурһнь алтн Галина Улюмджиевна Троицкое селәнд кедү гер тосхсн болх гинәт! Кесгнь эндр чигн төв селәнә уульнцсиг кеерүлҗәнә. Улсин эдл-ахуд ик ач-тусан күргсн шалдач-ширдәч Җамбша Галина Күндллһнә олн темдгүдәр ачлгдсн болдг. Тер мет Целинн района улсин бәәдл-җирһлд шунмһаһар орлцад, селәнә болн района депутатнрин Хүүвд кесг дәкҗ суңһгдла, тегәд 2016 җилд Галина Улюмджиевна Целинн района күндтә иргнә нер зүүснь чигн орта болв. Эн җилин лу сарин 13-д болхла ачта медәт 90 җилин өөнән темдглв. Үрднь, ачнр-зеенрнь, өөрхн элгн-саднь эңкр экән, килмҗтә ээҗән йөрәҗ, бүлән үгән нерәдв. Тогтсн авъясар тоомсрта ик наста көгшәд Әрәсән Президент Владимир Путинә йөрәлин бичг бәрүлҗ өггдв.
Иим улсин бәәдл-җирһлнь, күч-көлснә хаалһнь дорас өсч йовдг баһчудт эрк биш үлгүр-үзмҗ болҗ, омг үүдәх зөвтә гиҗ сангдна.
Һучн йисн җилдән Александр авальтаһан олна хормад багтад, дөрвн үрән өскәд, чик хаалһднь орулв. Эндр Җамбша Галина нәәмн ач-зеетә, тавн җич-зеенчтә ик ачта ээҗ болна (зургт).
http://halmgynn.ru/uploads/posts/2026-04/1776247879_05.jpg
КАРСАНА Евгения

Видео