Медәтнрин ач-тусинь темдгләд

Сегодня, 13:27 | Общество, Таңһчин зәңгс, Зіњг

Элстд Хальмг Таңһчин ачта улсин Хүүвин селвлцән болв. Таңһчин Толһачин һардврин ахлач Кирилл Попов, залврин ахлачин негдгч дарук Цернә Эрднь болн райодын муниципальн бүрдәцсин толһачнр алс зәәһин эв-арһар терүнд орлцсн мөн.
Хальмг Таңһчин ачта улсин Хүүвин ахлач Пашнана Эрднь 2025 җилин йовудт Хүүвин гешүд олн зүсн керг-үүлдврмүдт орлцсна тускар тодрхаһар келҗ өгв. Тер мет РМО-син көдлмш бас үнлгдв. «Күн ахта, девл захта» гиҗ келгддгәр, ямр чигн үүлиг давулхас урд медәтә, байн дамшлтта улсла эрк биш селвлцх кергтә, гиҗ Эрдне Лиджиевич темдглв.
Эн җил мана таңһчд ончта болн темдгтә өөн болн талдан керг-үүлдврмүд давулхар зуралҗана. Тедн дунд нег һазра бичәчнрин, шүлгчнрин, номтнрин, олна үүлдәчнрин өөн бас заах кергтә.
Җил болһн така сарин 5-д Хальмг Таңһчин Өдр темдглнәвидн. Эн чинртә байр угтад, сурһулин җил төгстл дунд сурһульмудт ирлцңгү кичәлмүд давулхар селвлцәнә йовудт шиидвр батлгдв. Тер кичәлмүдт таңһчин тууҗин, нертә улсин тускар дегтрмүд олзлад, һәәхүл бүрдәҗ болхмн. Шишлң кичәлмүд давуллһнд «Медрл» ниицәнә элчнриг бас орлцулх кергтә. Терүнәс нань ачта улсин Хүүвин гешүдин орлцлһтаһар район болһнд соньн харһлтс давулх седвәр бас орулгдв.
Хальмгин залврин ахлачин негдгч дарук Цернә Эрднь Әрәсән Президентин зәрлгәс иштә улсин ниицлтин җил зарлгдсиг темдгләд, давулгдх керг-үүлдврмүд эн төрмүдлә эрк биш ирлцх зөвтә гив. Олн келн-улс бәәдг мана таңһчин нер дуудулҗадг эгл көдләчнриг, Төрскән харсчадг баатрмудыг, авъяс-заңшалан, келән, сойлан хадһлҗадг болн талдан улсин үүлдвринь үнләд, дорас өсч йовдг баһчудт эднә тускар келҗ медүлх зөвтәвидн, гиҗ Эрднь Николаевич тоолврарн хувалцв.
- Чинртә керг-үүлдврмүд бүрдәлһнд күн болһн орлцх зөвтә. Хальмг Таңһчин Өдрин байрт райодын, талдан һазрт үүлддг хальмг ниицәсин гешүдиг, орн-нутгин балһсдт бәәдг нег һазра улсиг орлцулад, эн өдрин чинринь темдглх кергтә, – гиҗ Кирилл Попов күүндврт орлцв.
Телеүзлин, радион, барин көдләчнр болхла, эн сән Өдр угтад, нертә болн таңһчин социальн-экономикин делгрлтд ач-тусан күргсн улсин тускар бичҗ, үзүлҗ, соңсулҗ, олнд зәңглх йоста болв.
Хальмг келнә, келн-улсин сойлын төр босхсн кемд Пашнана Эрднь тер дотр «Хальмг үннд» бичгдлһнә тускар келхләрн, эврә газетән һазалҗ, ирлцңгү керг-үүлдврт эс орлцҗадг зәрм райодын толһачнриг шалһв. Эннь орта гиҗ лавтаһар иткүлҗ чадхвидн, юңгад гихлә зәрм райодт мана умшачнрин то баһрҗахнь басл һундлта юмн. Эрдне Лиджиевичин келсиг энүнә дарук Дәкин Раиса бас дөңнәд, газетин бичгдлһнә төр бас босхснь мадна төлә нег үлү темдгтә болсинь заахмн. Сүл цагт төрскн келән меддг улс цөн, тегәд хальмг кел хадһллһнд бас оньган тусхах кергтә. Төрскн келән медхин төлә хамгин түрүнд хальмг келәр һардг ор һанцхн газетән бичүлҗ авх кергтә болна. Эндр «Хальмг үннән» эс дөңнхлә, дорас өсч йовдг баһчудын иргчин тускар кен ухалхмб, гиҗ Раиса Батнасуновна һундлан медүлв.
Селвлцәнә чилгчәр Пашнана Эрднь ачта улсин Хүүвин ханьд орсн шин гешүдиг йөрәһәд, итклтә цаасинь бәрүлҗ өгв.
КАРСАНА Евгения

Видео