Нег һазра улсин җирһл ясрулхар

Сегодня, 14:01 | Общество, Таңһчин зәңгс, Зіњг

Җил болһн мөрн сарин 21-д мана орн-нутгт бәәрн залврин бүрдәцин Өдр темдглнә. Терүг Әрәсән Президентин зәрлгәс иштә 2012 җиләс авн темдглдг болсмн. Бәәрн залврин бүрдәцс улсин болн йосна хоорндк залһлдаг батрулна гиҗ келнә. Бидн хамгин түрүнд мана төрскн орн-нутгин, дорас өсч йовдг үйнрин сәәхн иргчин төлә көдлҗәнәвидн гиҗ орн-нутгин толһач Владимир Путин темдглсмн.
Мана таңһчин һардвр муниципальн бүрдәцсин чинр өөдлүллһнд бас ик оньг тусхана. Тиигәд, төрскн һазриннь делгрлтд туслҗ муниципальн йосна халхар олн җилдән көдлдг улст «Хальмг Таңһчин бәәрн залврин ачта көдләч» гидг нерн зүүлһгддг болв. Райодын болн селәдин муниципальн бүрдәцсин толһачнр нег һазра улсин сә хәәҗ көдлҗәнә. Мана таңһчд үүлдҗәдг муниципальн бүрдәцсин ниицәг Целинн района толһачин үүл дааҗадг Увшан Басң чадмгар һардҗана. Селәдин, балһсдын болн райодын муниципальн бүрдәцс бәәрн улсла бат залһлда бәрҗ, эднә төрмүдт орлцҗ, эдниг соньмсулҗадг төрмүдиг сәәнәр меднә. Тегәд эднә көдлмш сән йовудта болхин төлә мунципальн бүрдәцсин көдләчнрин төлә мергҗлт өөдлүллһнә керг-үүлдврмүд бүрдәгднә. Мана таңһчд кегдсн шинҗллтсин ашт әмтн хамгин түрүнд селәнә болн района толһачнр тал ямр нег төрәр ирдгнь лавта медгдв.
Үстин района Татал селәнә муниципальн бүрдәциг 2021 җиләс авн толһалҗадг Шаран Герлиг (зургт тал дунднь зогсчана) нег һазра улснь күндлнә, олн зүсн төрәр энүн тал ирнә. Энд өсәд-боссн Герл Викторовнаг цуһар сәәнәр меднә, төрскнч седклтә болн ик дааврта күн гиҗ темдглнә. Энүнә чадмг һардврт селәнәхн олн кергин седвәр татад, хамдан кесг төсв бәәдл-җирһлд тохрав. Тиигәд эдн бичкдүд нааддг талвң тосхв, Төрскән харсгч Алдр дәәнд әмнәсн хаһцсн нег һазра улсин санлын бумбин өөр-шидрк бәәрнд сән кец-таал тогтав, Чомпот селәнд ус бурһудлһна көдлмш күцәв, Татал селәнә уульнцст панрмуд углҗ тәвв. Төрскн селәнә делгрлтд ач-тусан күргсн улсин нердиг самбрт барлв. Селәнә сойлын Герт бас сән таал тогтагдв, тегәд ода энд ик-бичкн уга амрхдан дурта. Шаран Герлин седвәрәр цергә шишлң керг-үүлдврт орлцҗадг нег һазра дәәчнриг дөңнлһнә буйнч седклин кергүд бүрдәгднә. Эн җил Герл Викторовна Әрәсән күүкд улсин ниицәнә Күндллһнә һашгар ачлгдв. Бәәрн улс энүг дөңнҗ, эврә һазр-усна делгрлтин төлә арһ-чидлән агсад хамдан үүлдҗәхнь энүнд ик урмд өгнә.
Шидр «Цергллһн» гидг Цугәрәсән муниципальн мөрән марһана аш диглгдҗ, дииләчнрнь заагдсн билә. Эндр Москва балһснд «Бичкн Төрскн – Әрәсән күчн» гидг ик хургт терүнд диилвр бәрсн улсиг ачлхмн. Әрәсән булң болһнас бәәрн залврин бүрдәцсин элчнр цуглрад, сән Өдрән байрта-бахмҗтаһар темдглхмн. Эднә өдр-бүрин көдлмш үнлгдҗәхнь мана орн-нутгт бәәрн залврин бүрдәцсин чинр өөдлҗәхиг герчлҗәнә.
Батан Сәәхлә

Видео