Көдлмш хәәҗәдг әмтнд туслҗ

Сегодня, 14:10 | Общество, Таңһчин зәңгс, Зіњг

Давсн долан хонгт Әрәсән цуг регионмудар «Әрәсән көдлмш. Эв-арһсин цаг» гидг көдлмшәр тетклһнә керг-үүлдвр болв. Эн керг 2023 җиләс авн Әрәсән Президентин даалһврар давулгдҗана. 2025 җиләс авн эн «Кадрмуд» гидг келн-улсин төсвин йовудт көдлмшч эрдмин чинр өөдлүлхин күслтәһәр бүрдәгдҗәнә. Сән авъяст тохрсар эн керг-үүлдврин таңһчин девсң А.Амр-Санана нертә Келн-улсин дегтрин саңд болв. Таңһчин бүрдәцсин элчнр, дунд болн шишлң сурһульмудын оютнр болн сурһульчнр, көдлмш хәәҗәдг улс терүнд олар орлцв.
Хальмг Таңһчин залврин Ахлачин дарук –таңһчин то-дигин делгрлтин министр Этән Алексей яармд орлцачнриг йөрәһәд, эн керг-үүлдвр көдлмш уга болад җирһлин күнд таалд туссн улст, сурһулян төгсәҗәдг баһчудт иргчдән эрдм шүүҗ авхд туслна гив. Таңһчин бүрдәцс болхла эн керг-үүлдврин йовудт көдлмшч ормсин тускар зәңгләд, көдлмш хәәҗәдг улст дөң-нөкд болна. Эн җил цергә шишлң керг-үүлдврт орлцачнрин болн эднә өрк-бүлмүдин төлә шишлң талвң бүрдәгдәд, социальн харслтын төрмүдәр цәәлһвр өггдв. Эн җил яарм дөрвдәд бүрдәгдҗәнә, сүл һурвн җилин эргцд 600 күн көдлмш олҗ авснь эн керг-үүлдвр олзта-туста болҗахиг иткүлҗәнә, гиҗ Этән Алексей темдглв.
Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Маминә Ольга, таңһчин сурһуль-эрдмин болн номин министрин дарук Мацга Эльза керг-үүлдврт орлцҗадг бүрдәцсин элчнрт ханлтан өргв, сурһульчнрт болн оютнрт болхла көдлмшч эрдмин тускар соньмсад цәәлһвр авхинь селвглв. Таңһчд үүлддг дунд шишлң сурһулин бүрдәцсин элчнр сурһульчнрт уячин, һаңначин, замчин, җолачин эрдмин тускар келҗ өгсн деерән оютнр белдсн сенр хот-хол амсулв, машинкәр уйҗ үзх арһ өгв.
«Одн» завод, Яшкулин района «Улан хөөч» болн «2-ч тойгта хаалһин заллт», «Интерстрой», «Модн», хотл балһсна «Водоканал» болн «Балһсна эдл-аху» бүрдәцсин, дотр-дундын, харулын, әәмшг уга бәәдл тетклһнә цергллтсин элчнр көдлмшәр тетклһнә яармд җил болһн орлцна. «Россети» ПАО-н «Калмэнерго» бүрдәцин элч Дундун Цаһана келсәр, эднд баһ наста көдләчнриг дөңндг көтлвр күцәгднә, гер-бүүр нәәмәдлсн болн мөңг өгъәлҗ авсн цагт, профсоюзин ниицән дөңгән күргнә, бичкдүдин садын һаруһинь даңцана. Тер мет эрүл-мендән батруллһна туст бас шишлң көтлвр үүлднә гив. «Одн» заводын экономикин әңгин һардачин дарук Абушинә Полинан келсәр, эднд баһ наста көдләчнр кергтә. Түрүн кемд сурһульч болҗ дамшлт хоршасн цагт баһ наста көдләчин җалвнь 27 миңһн арслң тогтана, хөөннь болхла 65 миңһн арслңд күрч өөдлнә. Балһсна эдл--ахуд трактористнр, җолачнр, лифтермуд, урһмл суулһдг болн нань чигн көдлмшч эрдмтә улс кергтә болна, «Модн» бүрдәц уячин эрдмтә улсиг хәәҗәнә. Тегәд көдлх седкл бәәхлә, олн зүсн эрдмәр көдлмш олҗ авх арһ учрҗана.
Бидн цергә шишлң керг-үүлдврт орлцачнрин төлә бүрдәгдсн тавлңд бас одад, Элст балһсна әмтнә социальн харслтын әңгин элч Максан Дорҗла күүндвидн. Эднлә хамдан энд «Төрскән харсачнр» шаңһа саңгин таңһчд үүлддг әңгин элчнр СВО-н ветеранмудт болн теднә өрк-бүлмүдин гешүдт цәәлһвр өгв. «Цергә шишлң керг-үүлдврт орлцачнр эврә керг бүрдәҗ арһлачар үүлдхәр седҗәхлә, социальн бооца батлҗ болхмн. Урднь цергчнрин олз-оруһин кемҗән тоод авгддг бәәсн болхла, эн җиләс авн арһлачнрт эврә керг бүрдәхин туст онц зөв өггдв. «Мини керг» гидг төв ветеранмудт бизнесин халхар зура белдхд нөкд болна, хөөннь бидн социальн бооца батлхд бәрмт цаасинь белднәвидн. Сүл җилмүдт мана балһснд 4 ветеран эврә кергән бүтәв. Эн җил декәд нег күн тосхлтын халхар эврәннь кергән делгрүлҗәнә. Социальн бооца батлад, эн шишлң кергсл хулдҗ авв», - гиҗ Максан Дорҗ цәәлһв.
Әрәсән регионмудар түрүн девсң төгсснә хөөн мөчн сарин 27-д орн-нутгин девсң болхмн. Келхәс, эн керг-үүлдврин йовудт таңһчин меҗә һатц чигн талдан регионмуд тааста көдлмш бас олҗ авч болхмн.
ДООҖАН Наталья
ЗУРГТ: баһчуд яармд ирҗ орлцв

Видео