Балһсна төв уульнцар йовад

Сегодня, 14:41 | Общество, Таңһчин зәңгс, Зіњг

Давсн амрлһна өдрмүдт бамб цецгин наадмин керг-үүлдврмүд цааранднь болв. Наадмин йовудт түрүн болҗ олна нәр болснь әмтнә оньг авлв. Хотл балһсна «Долан хонгин суврһн» гидг төв талвңгас авн «Иньгллт» парк күртл цуһар йовһар йовв. Эн керг-үүлдврт Москва балһснас ирсн «Артнонстоп» циркин артистнр орлцхар ирснь олн-әмтнд үзмҗтә болв.
- Эндр циркин артистнрин нарт-делкән өдр темдглгдҗәнә. Тегәд эн ончта өдрлә бидн тана таңһчур ирәд, бамб цецгин наадмд орлцсндан ик байрта бәәнәвидн. Бидн түрүн болҗ нааран ирвидн, тана сәәхн хотл Элст балһсн маднд таасгдв. Энд цаһан седклтә, гиичнрән бүләнәр тосдг улс бәәнә. Мана циркин артистнр һаза уульнцст олн зүсн наад үзүлнә. Бидн һал, шам олзлҗ өвәрц наадд үзүлсн деерән ут мод түшҗ йовнавидн. Эндр 18 артист ирсн бәәнә, цуһар эдн таңһчин әмтнд болн гиичнрт сергмҗтә нәр-наад үзүлх, - гиҗ циркин һардач Аркадий Нэтов келв.
Москваһас ирсн гиичнрлә хамдан Орс Келн-улсин театрин, «Эрдм» улсин ансамблин артистнр эн керг-үүлдврт орлцв. Чонкуша Петрин нертә билг-эрдмин колледжин кеңкргчнр эдниг толһалҗ йовв. Балһсна төв талвңгас парк күртл йовсн артистнриг олн әмтн бас дахв. Нег үлү бичкдүд циркин артистнрт байрлҗ, эднлә хамдан олн зүсн даалһвр күцәв. Балһснд сән кец-таал тогталһна көтлврин йовудт кеерүлгдсн аллейин хаалһар, шинрүлгдсн Б.Б.Городовиковин нертә уульнцар цуһар хамдан йовад, зәрм ормд зогсад артистнрин билг-эрдмлә таньлдв.
«Эрдм» улсин ансамбльд орлцач Шарапа Евгениян келсәр, эдн түрүн болҗ иим керг-үүлдврт орлцв. Циркин артистнр олн зүсн кегдлмүд олзлҗ эв-дован үзүлснь бичкдүдт йир таасгдв. Җил ирвәс бамб цецгин наадм өргмҗтәһәр давулгдҗахнь, олн гиичнр терүнд орлцхар ирҗәхнь байрта гиҗ медәт келв. «Эн җилин намрар мана ансамбль 40 җилин өөнән темдглхмн. Ода бидн өөнин концертд белдҗәнәвидн. Амрлһна өдрмүдт иигәд хамдан харһад, байрин керг-үүлдврт бас орлцнавидн. Бидн хальмг хувцан өмсәд, Москваһас ирсн циркин болн Орс Келн-улсин театрин артистнрлә хамдан йовад паркд ирвидн. Эндр мана хотл балһснд кесг гиичнр ирснь үзгднә, цуһар мана Элст сәәхн, өвәрц, дорд үзгин кев-янзта балһсн гиҗ темдглнә. Уульнцст олн зүсн өңгтә бамб цецгүд цецгәрҗәхнь олнд ик өврмҗтә болна», - гиҗ Евгения Николаевна келв. «Иньгллт» паркин Диилврин талвңд цуһар цуглрад, артистнрлә хамдан зурган цокулв.
БАТАН Наталья

Видео