Бумблвин эргндк һазриг кеерүлхәр

Сегодня, 11:42 | Общество, Таңһчин зәңгс, Зіњг

Урҗ өдр Элстин дорд үзгт бәәдг «Буйслһн болн босхмҗ» бумблвин эргндк һазрт сән кец-таал тогталһна төрәр өргн сүүр болв. Элст балһсна һардврин ахлачин дарук Хаска Сергей терүг давулв.
– «Буйслһн болн босхмҗ» мана өвкнрин һашута җилмүдиг мөңкрүлсн бумблв болна. Эннь әрүн санл хадһлҗадг орм болҗахинь цуһар медҗәнә. Зуг эргндк бәәдлинь ясрулҗ, сән таал тогтах кергтә, – гиҗ Хаска Сергей харһлтыг секв.
Эн көдлмшиг «Ф-Консалтинг» бүрдәц күцәх болв. Энүнә һардач, архитектор Никита Зарытов бумблвин эргндк һазрин зуран тускар тодрхаһар келҗ өгв. Олн-әмтнә санл хадһлҗадг әрүн ормд урһа модд болн цецгүд олар суулһад, тер мет услврин шишлң кергсл углҗ тәвх болв. Бумблвин эргнд парк тосхгдад, хаврин болн зуни цагт медәтнр чигн, дорас өсч йовдг үйнр чигн нааран ирәд, сул цаган сергмҗтәһәр давулҗ чадхмн. Парк кесг әңгд хувагдад, әңг болһнднь хальмгудыг Сиврүр нүүлһсн һазрнь заагдхмн. Сүүрин йовудт ах үйин улс, баһчуд цугтан седвәрән орулад, ухан-тоолврарн хувалцв.
Бумблвин өмн үзгт суврһ босххар зуралҗана, цуг талвңгуд шар өңгәр ширдгдх болҗ шиидгдв. Тер мет энд санлын самбр бас углҗ тәвхмн.
Элст балһсна һардвр эн бумблв шинрүллһнә төсвиг шаңһа көтлврт орулхар зуралв. Хаска Сергейин темдглсәр, урднь балһснд сән кец-таал тогталһна туск хойр төсв диилвр бәрсн билә, тегәд цаарандан чигн сән йовудтаһар көдлх зөвтәвидн гиҗ эн келв.
КАРСАНА Евгения

Видео