Сән дурар цусан өгәд

Сегодня, 12:14 | Общество, Таңһчин зәңгс, Зіњг

Шидр Элстд донормудын Келн-улсин Өдрлә ирлцүлҗ олн җилин туршарт эврә сән дурар цусан өгчәдг улст «Әрәсән күндтә донор» гидг өөдән нер зүүсн улсиг ачлад йөрәв. «Цусна төв» таңһчин бүрдәцин һардач Уташа Санҗ, «Хальмгин донормуд» ниицәнә ахлач Манҗикә Басң болн «Улан Кирсин» таңһчд үүлддг әңгин ахлач Пүрбән Олег донормудыг сән Өдрлә йөрәһәд, эдн цусан өгч күнд бәәдлд туссн улсин әм аврдг төләдән өр-өвч седклтә болн зөрмг улс мөн гиҗ темдглв. Келхд, Уташа Санҗ бийнь бас Әрәсән күндтә донор болна, эн зун шаху дәкҗ цусан өгсмн.
Өөдән ачлвр авсн улс дунд Әрәсән зарһин приставмудын Хальмг Таңһчд үүлддг заллтын көдләч Берикә Сергей бас заагдв. Эн 2008 җилд Хальмг ик сурһульд сурчасн цагтан түрүн болҗ цусан өгсмн. Үр көвүнә эцкд месллһнә хөөн цусн керглгдв, тегәд Сергей цусан өгәд, әминь аврхд туслсн мөн. Тер цагас авн эн дару-дарунь цусан өгдг болв. Энүнә цусн ховр багин тоод орна, тегәд «Цусна төв» таңһчин бүрдәцин көдләчнрин түрүн дуудврар цусан өгдг болв. Эн чик авг-бәрцтә күн, цогц-махмудан батрулҗ эрүл-мендин бәәдлән даңгин шинҗлнә. «Би дотр-дундын кергүдин бүрдәцст арвн негн җилдән көдлләв, зарһин приставмудын цергллтд җил хооран ирләв. Хамдан көдлҗәдг үүрмүдтәһән цусан өглһнә керг-үүлдврмүдт орлцнавидн. Мана цусн кенд туслхнь медхшвидн, болв зеткртә йовдлла харһад эс гиҗ күнд гемәр гемтсн улст цусн эн эрк биш кергтә болхнь медгднә», - гиҗ Берикә Сергей келнә.
Олн җилин эргцд эврә сән дурар цусан өгчәдг Зуман Валентина бас өөдән ачлвр авв. Күүкд күүнә келсәр, эн арвн нәәмтәһәсн авн цусан өгчәнә. Эн җил күүкд күн 60 наснаннь өөнән темдглхмн, зуг чирә-зүсәрн баахн күн болҗ медгднә. Эн һурвн сар болад цусан өгнә. Келхд, эднә өрк-бүлд Лидия эгчнь бас «Әрәсән күндтә донор» гидг нер зүүнә. Күүкд күүнә тоолврар, цусан өгдг улс эрүл-менд болна. Цусан өгснә хөөн цуснь шинрәд, цогц-махмуднь батрад, чидл урһсн болҗ медгднә. Эн дару-дарунь эмчд одад, эрүл-мендин бәәдлән шинҗлҗ, арднь орҗ бийән хәләнә. Юңгад гихлә генткн энүнә цусн кен-негнднь кергтә чигн болх гиҗ күүкд күн саг бәәнә.
Күндтә донормудын нер зүүсн улсиг «Иргчин төлә» саңгин болн «House of flowers» лавкин элчнр бас йөрәһәд, белгүд болн сәәхн цецгүд бәрүлҗ өгв. Ачлгдсн донормудын нерн деерәс Задбан Алдр ханлтын үг келәд, цааранднь чигн сән дурар цусан өгч әмтнд дөң-тусан күргхвидн гиҗ иткүлв.
ДООҖАН Наталья
ЗУРГТ: Әрәсән күндтә донормудыг ачлсн кем

Видео