Мана умшачд – үнтә белг

Сегодня, 15:06 | Общество, Таңһчин зәңгс, Зіњг

Җил болһн «Хальмг үнн» газет бичүлҗ авсн умшачнр дунд урмдулгч лотерей болна. Сүл җилмүдт барт бичгдлһнә керг-үүлдврин ашар Лаганя район даңгин нүүрт һарна. Одахн Көк теңгсин көвәд болсн Бамб цецгин наадмин йовудт мана редакцин элчнр дарани лотерей давулв. Терүнә йовудт һучн зурһан белг шүүгдв. Тер тооһас һучн белг Лаганя района муниципальн бүрдәц белдв. Наадк зурһан белг «Калмыкия» таңһчин зәңгллһнә агентств йилһв, тер тоод хамгин үнтә мөрә сән һара киитрүләч болв.

Темдглхд, барт бичгдлһнә ашар Лаганя района элчнрлә зерглҗ Яшкулин, Сарпан болн Хар Һазра райодт бәәдг мана итклтә умшачнрин дөң-нөкдиг бас темдглх кергтә гиҗ сангдна.
Шидр һол мөрә шүүҗ авсн Лаганя района Улан Хол селәнә дунд сурһулин багш Нәдвдә Саглриг (зургт) бас нег йөрәҗ, ухан-тоолврарн хувалцхинь сурвидн.
Олн җилдән багшлҗадг Саглр Нимяшевна «Хальмг үнн» газетиг даңгин бичүлҗ авдг болв. Бийнь эн Улан Хол селәнд өсч-босв. Дунд сурһулян төгсәснә хөөн Элстин билг-эрдмин училищд хальмг келн-улсин зевсгүдин әңгд орҗ сурсмн. 1994 җиләс авн Лагань балһсна көгмҗин сурһульд хальмг домбр цокдг эрдмиг бичкдүдт дасхсн билә. 2011 җиләс авн болхла эн Улан Хол селәнә дунд сурһульд көдлдг болв. Эндр энд 85 көвүн-күүкн сурна, психолог-багш Нәдвдә Саглр сурһульч болһнд килмҗән тусхаҗ, шишлң кичәлмүд давулна. Көдлмшән үнн-чик седклтәһәр, даавртаһар күцәсн төләдән сурһуль-эрдмин халхар Күндллһнә олн темдгүдәр эн ачлгдсмн. Авальтаһан хамдан хойр көвү өскәд, чик хаалһднь орулсмн.
Бембә өдрлә «Хальмг үннә» лотерейд хамгин үнтә белг шүүҗ авсна тускар энүнд хамдан көдлҗәдг ачта багш, тер өдр Лаганя района күндтә иргнә нер зүүсн Идриса Лидия җиңнүлҗ келсн бәәҗ. Тер саамд гертән бәәсн Саглр Нимяшевнад олн үүрмүднь, элгн-саднь байрта зәңг соңссна дар дару-дарунь җиңнүләд цугтан йөрәв.
Энүнә келсәр, хальмг газетд барлгддг соньн хамг тоотыг умшад, шинҗләд, көдлмштән даңгин олзлдг болв. Кесг җил хооран һарсн тойгудыг чигн бас әрүнәр хадһлҗахан медүлв.
Бидн үнтә белг шүүҗ авсн умшачан йөрәҗ, цааранднь чигн газетд бичүлгдҗ, төрскн келән, авг-бәрцән, сойлан делгрүлҗ йовхинь дурдвидн.
Нәдвдә Саглр иим үнтә белг шүүҗ авсндан ик байрта бәәхән медүлҗ, «Калмыкия» зәңгллһнә агенствин, тер дотр «Хальмг үннә» коллективст зүркни ханлтан өргв.

КАРСАНА Евгения

Видео