Үрс Сарин буйнта керг

27-05-2026, 10:14 | Общество, Таңһчин зәңгс, Зіњг

Мана өвкнрин хуучн авъясар Үрс Сард кесн сән кергин буйн кесг холванд икдҗ, олнд туста болна гиҗ тоолгддг. Шидр Хальмг Таңһчин күүкд улсин ниицәнә Үстин районд үүлддг әңгин гешүдин седвәрәр Элстин социальн теткврин бүрдәцд болн медәтнрин гер-интернатд буйнч седклин керг күцәгдв. Һурвн зун дууна һазрт Иҗл һолын көвәд бәәдг үстихн өнчн бичкдүдт болн гемтә-шалтгта медәтнрт билг-эрдмән үзүлҗ, белгән нерәдҗ, шикр-балтаһар тоов.
Района күүкд улсин ниицәнә ахлач Үлмҗин Нүүдлән келсәр, эдн социальн бүрдәцслә залһлда бәрҗ, иргчдән дәкәд чигн ирҗ хамцу керг-үүлдврмүд давулхар зуралҗана. «Үрс Сарин байрла иим буйнч седклин керг-үүлдвр бүрдәһәд, социальн бүрдәцст бәәдг бичкдүдт болн медәтнрт түрүн болҗ золһҗ ирвидн. Мана района арһлачнр, Цаһан Амн селәнә сурһуль-эрдмин бүрдәцс демән күргҗ, белг хулдҗ авхд дөңнв. Гемтә-шалтгта бичкдүдт үүдәлтин төлә олн зүсн кегдлмүд, хот халулдг беш, наадһас, хувц-хунр авч ирвидн. Эрмдгтә улсин болн медәтнрин Герт бас одад, концерт үзүлҗ аав-ээҗнрт белг бәрүлҗ өгхвидн. Мана олна ниицәнә ханьд һучн һар күүкд күн орна, бидн района бәәдл-җирһлд шунмһаһар орлцнавидн. Мана нөкцлт делгрәд бидн иньгллтин залһлда батрулҗ дәкәд чигн гиичлҗ ирхвидн», - гиҗ Нүдлә Васильевна келв.
Районд олн җилдән үүлдҗәдг «Булг» ансамбльд орлцач Хаман Марина хальмг дуд дуулҗ сергмҗ үүдәв. Далн хойрта Марина Манджиевна олн җилдән улсин ансамбльд ордг деерән эврә сән дурар үүлддг медәтнрин «Дулан зүркд» гидг багин гешүдлә хамдан буйнч седклин кергүд бүрдәнә. Эдн цергә шишлң керг-үүлдврт орлцҗадг нег һазра улсиг дөңнҗ, дулан хувц, хот-хол, олн зүсн кегдлмүд цуглулҗ йовулна. Холд йовдг дәәчнриг эдн цугтаһинь сәәнәр меднә, тегәд теднә өрк-бүлмүдиг оньгасн алдлго нөкд болна. «Иҗлин айс» ансамблин күүкд-көвүд эн буйнч седклин кергт бас орлцад, хальмг болн хасг би биилҗ, мана таңһчд бәәдг олн келн-улсин ниицлт бат болҗахиг медүлв. Социальн бүрдәцсин бичкдүд болн медәтнр эдниг байртаһар тосч авв. Күүкд улсин олна ниицәнә гешүд Увшан Алена болн Любовь Сургалиева еңсг сәәхн дууһарн чикнә хуҗр хаңһав. Эн керг-үүлдвр Әрәсән улсин ниицлтин җилд бас нерәдгдв, тегәд орс, хальмг, бурят, хасг ду-би харһлтыг кеерүлв.
Хальмг Таңһчин күүкд улсин ниицәнә ахлач Эскләнә Данара Үстин района әңгин седвәриг өөдәнәр үнлҗ, эдн цугтаһаснь түрүлҗ иим керг бүрдәсиг темдглв. Данара Босхомджиевна гемтә-шалтгта медәтнрин гер-интернатын һардач Каманҗан Александрт болн социальн теткврин бүрдәцин һардачин дарук Санҗин Арслңд белг бәрүлҗ өгв. Социальн бүрдәцсин һардачнр күүкд улсин олна ниицәнә гешүдт болн уйн наста билгтнрт ханлтан өргәд, хөв-кишг дурдв. Эн өдрәс авн эдн иньгллтин залһлда батрулҗ, дару-дарунь харһх болв.

ДООҖАН Наталья
ЗУРГТ: гемтә-шалтгта улсин болн медәтнрин Элстин
гер-интернатд болсн харһлт

Видео