Арһлачнр - баһ тетквртә улст

Сегодня, 11:16 | Общество, Таңһчин зәңгс, Зіњг

«Дари добро» гидг Хальмг буйнч седклин олна саң олн җилин эргцд баһ тетквртә, олн үртә, гемтә-шалтгта бичкдүдиг асрҗадг өрк-бүлмүдт дөң-нөкд болҗана. Эднә седвәрәр давулгддг буйнч седклин кергүд сән авъяст тохрв гиҗ келҗ болҗана. Нидн эдн таңһчин район болһнд одад, олн үртә болн баһ тетквртә өрк-бүлмүдт хувц-хунр, һосн-башмг, наадһас өңгәр түгәҗ өгсн билә. Шидр эн саңгин болн «Справедливая Россия» партин таңһчд үүлддг әңгин седвәрәр иим керг-үүлдвр Аршан поселкд давв.
- «Тепло доброты» гидг керг-үүлдвриг бидн Әрәсән Өдрт нерәдҗ давулҗанавидн. Эн поселкд олн үртә болн баһ тетквртә хойр зун шаху болн эрмдгтә бичкдүдиг асрҗадг 23 өрк-бүл бәәхиг медәд, буйнч седклин керг бүрдәхәр шиидвидн. Таңһчин арһлачнр маднд дөң-нөкд болв, тегәд бидн ут тоодан 400 киил эд-тавр түгәҗ өгхвидн. Эндр бәәрн дунд сурһульд болн сойлын Герт эн керг-үүлдвр болхмн. Эн җилин туула сард бидн Троицкое селәнд ирлцңгү керг давулад, 2 тонн хувц-хунр, олн зүсн эд-тавр әмтнд өгсн биләвидн, - гиҗ буйнч седклин саңгин ахлач Эльза Шамова келв.
Эн керг-үүлдвр давуллһнд «Справедливая Россия» партин таңһчд үүлддг әңг орлцв. Региональн әңгин ахлач Наталья Зинченко дөңгән күргсн арһлачнрт ханлтан өргв. Арһлачнр Наталья Новикова, Эрнцнә Кермн олн зүсн хувц-хунр, башмг, наадһас йилһҗ өгәд, баһ тетквртә болн җирһлин күнд таалд туссн улст цаһан седкләсн нөкд болв. Келхд, эн кергт орлцсн күн болһн тавн зүсн эд-тавр авч чадв. Кесгнь күүкдтән намртан эс гиҗ үвлдән өмсх дулан хувц авв, юңгад гихлә терүг хулдҗ авхд баһ биш мөңгн кергтә болна.
Долан үртә Сарла Наталья бийнь Троицкое селәнд бәәнә, болв эн керг-үүлдвр болхиг медәд, нааран ирв. Долан үрнәснь негнь эрмдгтә, бийнь күүкд күн ачта амрлһнд һарсн бәәнә. Эн түрүн болҗ иим кергт орлцв, тегәд терүг бүрдәһәчнрт болн арһлачнрт ик ханлтан өргв. «Би күүкдтән дулан хувц авв, юңгад гихлә цугтаднь хулдҗ авхла дала мөңгн кергтә. Келхд, арһлачнр йилһсн хувцн сән чинртә, ке-сәәхн, күүкдт таасгдх гиҗ санҗанав. Үрс Сард иим керг бүрдәсн улст эннь буйн болтха», гиҗ күүкд күн келв.
Аршан поселкд бәәдг медәт Шоглян Ксения эн керг-үүлдвр бүрдәсн улст бас ханлтан өргҗ, Наталья Зинченкон тускар онц келв. Хойр җил хооран арһлач поселкд бәәдг Бодь Суврһна эргндк һазриг ясч, хаша-хаац кехд демән күргв. Ксения Борисовна бийнь өр-өвч седклтә, седвәртә медәт мөн. 2017 җилд энүнә седвәрәр энд Бодь Суврһн босхгдсмн, ода эн эргндк һазринь ахулҗ сән кец-таал тогтана. Дәкәд көгшә цергә шишлң керг-үүлдврт орлцҗадг нег һазра дәәчнрт дулан хувц өгүлнә, одахн ик усн орад, зовлң эдлсн Дагестана улст эн бас чадсарн демән күргв. Бийнь дөрвн үртә, нәәмн ач-зеетә медәт мөн. Эн керг-үүлдврт орлцад, бийдән хувц, бичкн зеедән наадһа авсндан байрлв.
Буйнч седклин саң сурһулин җилин өмн өргнд олн үртә болн баһ тетквртә өрк-бүлмүдин бичкдүдт сурһульднь кергтә эд-тавр хулдҗ өгхәр зуралҗана. «Дари добро» гидг олна саң болн «Справедливая Россия» партин таңһчд үүлддг әңг хамдан иим керг-үүлдврмүд дәкәд чигн давулх саната.

ДООҖАН Наталья
ЗУРГТ: буйнч седклин
керг-үүлдврин кем

Видео