«Төрскән харсачнр» саңгин өөнд нерәдәд

18-06-2026, 11:04 | Общество, Таңһчин зәңгс, Зіњг

«Төрскән харсачнр» шаңһа саңгин әңг мана таңһчд секгдәд, һурвн җилин өөнән темдглв. Шидр өөнин байрин концерт болв. Цергә шишлң керг-үүлдврин ветеранмудын болн эндр даалһвран күцәҗәдг дәәчнрин өрк-бүлмүдин гешүд терүнд орлцв. Тер мет регионмуд хоорндк II параспартакиадт гиичнрин багмуд орлцснь темдгтә болв.
Хальмг Таңһчин сойлын бон зуульчллһна министерств энүг бүрдәсн болдг. Концертин йовудт таңһчин сойлын коллективс болн нертә артистнр билг-эрдмән үзүлв.
Темдглхәс, керг-үүлдврт таңһчин Улсин Хуралын (Парламентин) Ахлач Артем Михайлов орлцад, «Төрскән харсачнр» саңгин хәләврт бәәдг СВО-н ветеранмуд Бамбша Владимирт, Гордован Эрдньд, Нәдвдә Канурт, Санҗин Нарнд, Үлмҗин Андрейд болн Батырхан Мыкбаевд Делгә Эрднин медальмүд өрчднь зүүлһв.
Эн баатрмуд цергә шишлң керг-үүлдврин йовудт залу-зөрмгәрн ончрад, шаңһа ачлврмудар темдглгдсн болв.
Хаалһин Очрин келсәр, һурвн җилин туршарт саңгин мергҗлтнр күцәмҗтәһәр көдләд, байн дамшлт хоршав. Көдләч болһнд ханлтан өргәд, цааранднь чигн Төрскән харсчадг улсиг цуг халхар дөңнәд, нөкд болхдан белн бәәхән эн медүлв.
Төрскән харсад, әмнәсн хаһцсн нег дәәчин авальнь «Төрскән харсачнр» саңгин көдлмш өөдәнәр үнләд, оньган өгәд болн килмҗән тусхаһад, энд көдлҗәдг мергҗлтнрт ик ханлтан өргәд, саңгин көдлмшт күцәмҗ дурдв. Өөнин концерт үр-иньгин таалд давсинь темдглх кергтә.
ОЛЬДАН Цаһан

Видео