Эмнлһнә көдләчнриг ачлв

Сегодня, 17:40 | Общество, Таңһчин зәңгс, Зіњг

П.Жемчуевин нертә таңһчин эмнлһнд эрүл-менд харлһна көдләчин Өдр угтҗ байрин хург болв. Хальмг Таңһчин Улсин Хуралын (Парламентин) депутат Цекрә Зулта, таңһчин эрүл-менд харлһна министрин селвгч, таңһчин эмчнрин олна ниицәнә ахлач Батыра Зинаида, таңһчин эрүл-менд харлһна министерствин олна хүүвин ахлач Балтыра Александр, таңһчин эрүл-менд харлһна көдләчнрин профсоюзин ахлач Манжикә Евгения эмнлһнә көдләчнриг сән Өдрлә йөрәһәд, олн җилдән үнн-чик седклтәһәр көдлҗәдг мергҗлтнрт ачлврмуд бәрүлҗ өгв.
Таңһчин эмнлһнә ах эмч Чумпинә Саглр хамдан көдлҗәдг үүрмүдән бас йөрәҗ, эмчин эрдм хамгин чинртә, тегәд әмтнд килмҗән тусхаҗ, дөң-нөкд болҗ көдлмшән даавртаһар күцәхиг дурдв. Шүүҗ авсн эрдмәрн олн җилдән көдлҗ, әмтнә әм аврҗ, седклән тәвҗ көдлҗәдг улс Күндллһнә һашгудар ачлгдв. Тиигәд, эмчнр Буринә Анна, Дорҗин Жанна, медицинск эгчнр Гаван Джамиля, Абушинә Гилән, Аҗин Светлана, Увшан Елена болн нань чигн мергҗлтнр Әрәсән эрүл-менд харлһна министрин Ханлтын бичгәр ачлгдсиг үүрмүднь байртаһар тосв. Хирургическ әңгин медицинск эгч Абушинә Гилән Т.Хахлынован нертә медицинск колледж төгсәһәд, нег ормдан хөрн җилдән көдлҗәнә.
Таңһчин зака үүдәгч Хургин депутат Цекрә Зулта зүркнә-судцна гем эмндг 2-ч әңгин һардач Катан Кермнд болн судцна төвин һардач Насна Светланад (зургт) Хальмг Таңһчин Улсин Хуралын (Парламентин) Диплом бәрүлҗ өгв. Светлана Климовна арвн тавн җилдән эрүл-менд харлһна халхар көдлҗәнә, Москва балһснд көдлснә хөөн баахн мергҗлт төрскн һазртан хәрҗ ирәд, таңһчин эмнлһнә улд секгдсн судцна төвд гемтә улст өөдән чинртә дөң күргҗәнә. Өөдән мергҗлттә эмч өдгә цага эв-арһс олзлҗ, месллһ кеһәд йилһрв. Энүнә һардврт таңһчин райодын эмнлһсин эмчнр гемтә улст ЭКГ-шинҗллт кеҗ, түргн дөң күргәд кесг күүнә әм аврна. Насна Светлана баһ наста кадрмуд белдлһнә, эмчнрин мергҗлт өөдлүллһнд оньган тусхана.
Светлана Климовнан келсәр, эн ик сурһуль төгсәснә хөөн Москва балһснд Боткинә нертә эмнлһнд көдлсмн, номин халхар чигн үүлдхәр зуралҗасн бәәҗ. Судцна төв үүлдврән эклснәс авн ут тоодан 15 миңһн месллһн кегдв, өдр болһн зүркнә гемтә 10-12 күүнд өөдән чинртә дөң күргнә. Райодын болн селәдин эмнлһсин үүлдвриг чикәр бүрдәҗ, түргн дөң күргдг болсна ашт зүркнә-судцна гемәс хорсн улсин то кесг холванд баһрв.
Байрин хургт таңһчин эмнлһнә көдләчнрин күүкд дунд зарлгдсн «Мини эк-эцк – эрүл-менд харлһна көдләч» гидг зургудын марһана аш диглгдв. Күүкд-көвүдиг бас ачлад, күн болһнд белг бәрүлҗ өгв.
ДООҖАН Наталья

Видео