Келн-улсин политикин көтлвр батлгдв

Сегодня, 17:42 | Общество, Таңһчин зәңгс, Зіњг

Урҗ өдр Элстд Әрәсән Президентин һардврин, Өмн үзгин дуһргин ведомствсин, Хальмгин һардврин, зөв-йос харлһна бүрдәцсин элчнрин, шинҗләчнрин болн талдан мергҗлтнрин орлцлһтаһар 2036 җил күртл келн-улсин политикин халхар күцәгдх көтлврин тускар өргн сүүр болв.
Хальмг Таңһчин Толһач Хаска Бату сүүриг секәд, 417 җил хооран хальмг улс Әрәсән ханьд орад, тер цагас авн орн-нутгт бәәдг олн келн-улсин элчнрлә хамдан ниитәһәр бәәхиг темдглв.
Харһлтын йовудт сүл цагин эргцд Хальмг Таңһчд болсн чинртә керг-үүлдврмүдин тускар видеозурц күндтә гиичнрин оньгт тусхагдв. Тер тоод нидн Элстд болсн шар шаҗна III нарт-делкән хургин тускар келгдв. Тер мет Элстин чонҗд мөргүл болсн цагт Иисус Христос бууҗ ирснә ончта йовдлын 80 җил болҗахин, энүнлә ирлцҗ намртан бүрдәгдх керг-үүлдврин тускар бас заагдв. Темдглхәс, цергә шишлң керг-үүлдврин йовудт даалһвран күцәҗ йовад, әмнәсн хаһцсн нег һазра Лиҗин Мингияна болн Очр-Һәрән Нарна Әрәсән хойр Баатрин нерд бас сергәгдв.
Тавн һар частан болсн сүүрин йовудт энүнд орлцачнр олн илдкл соңсв. Орн-нутгин Президентин зәрлгәс иштә улсин ниицлтин җил давулгдсн эн сүүр иргнмүдин зөв, келн-улсин хоорндк хәрлцә батллһнд эрк биш туслхнь лавта гиҗ темдглгдв.
Әрәсән Олна палатын гешүн, келн-улсин хоорндк седкүлчнрин Гильдин һардач Маргарита Лянген келсәр, ирлцңгү сүүрмүд орн-нутгин регионмудт җил болһн давулгдна. Соньн илдклмүд соңссн деерән тер мет сүүрт орлцачнр ил күүндвр тогтасн деерән нәрн төрмүдән хамдан хаһлдг арһ олна гив.
– Элст балһсн Әрәсән Өмн үзгин сувсн болн Хальмг Таңһч Европд шар шаҗна төв болҗахиг цуһар үзв. Нааран би кесг дәкҗ ирҗәнәв. Җил ирвәс тана хотл балһсн өсәд-өргҗәд бәәхнь сән йовдл мөн. Олн җилдән Хальмгин номин элчнрлә бат залһлда бәрҗ йовнав. Тана таңһчин һардвр келн-улсин хоорндк иньгллт болн ниицлт батруллһна халхар ик көдлмш күцәһәд, нилчән күргҗәхинь сүүрин йовудт темдглгдв, – гиҗ Өмн үзгин ик сурһулин социологин болн регионоведеня күрәлңгин һардач Андрей Бедрик тоолвран келв.
Келн-улсин кергүдәр үүлддг шаңһа Агентствин һардачин дарук Станислав Бедкинә үгәр болхла, түрүн болҗ эн йирдгч җилмүдт Хальмгт ирсн бәәҗ. Элст сәәхрәд хүврснә тускар эн бас келв. Сүүрин йовудт келн-улсин политикин халхар ирх җилмүдт кех-күцәгдх көтлвр батлгдв. Түрүн болҗ шин көтлврт орс улсин тускар шишлң әңг орв, гиҗ Станислав Анатольевич темдглсн болдг.
Харһлтын ашар өргн сүүрт орлцачнр шинҗләчнрин орулгдсн седвәриг болн сүв-селвгүдиг учртан авч, келн-улсин политикин шин зура батлв. Дарани ирлцңгү харһлт ЮФО-н талдан регионд бүрдәгдх, Элстд болсн сүүр сән йовудтаһар үр-иньгин таалд давулгдсинь цуһар темдглв.
КАРСАНА Евгения

Видео