«Нүүдл улсин делкә»

Сегодня, 15:43 | Общество, Таңһчин зәңгс, Зіњг

Н. Пальмовин нертә Келн-улсин музейин һәәхүлмүд талдан һазрт болҗахнь йирин йовдл болв. Иим һәәхүлмүдин дөңгәр музейин көдләчнр Хальмгин, хальмгудын тууҗин болн сойлын тускар талдан келн-улст медүлнә. Казахстан Республикин Атырау балһснд мөчн сарин 18-әс авн 20 күртл «Нүүдл улсин делкә» гиҗ нерәдгдсн Хальмг музейин дарани һәәхүл давв.
Атырауд һәәхүлиг байрин бәәдлд секлһнд номтнр, олна үүлдәчнр, сойлын, архивин, балһсна һардврин көдләчнр орлцв. Халел Досмухамедовин нертә Атыраусск ик сурһулин багшнриг болн оютнриг һәәхүл икәр соньмсулв. Казахстана улсин Ассамблейин гешүд бас оларн ирҗ, һәәхүлд орлцв.
Мана музейин һардач Муучан Иринан келсәр, дамҗад йовдг эн һәәхүл Хальмг Таңһчин тууҗин болн сойлын байн зөөрлә олн улсиг таньлдулв. Музейин эн үүлдвр орн-нутгин болн һазадын нутгудын хәләһәчнрт болн музеймүдин көдләчнрт даңгин таасгдна. Ирлцңгү һәәхүл давсн җилд Беларусь Республикд үзүлгдсн билә. Сербин хәләһәчнр чигн энүнлә таньлдла.
Н. Пальмовин нертә Келн-улсин музейин көрңд этнографин долан миңһн һар кегдл бәәнә. Цуг тер тоот ик чинртә болҗана. Тууҗин халхар соньн болсн деерән хальмг улс ямаран кевәр бәәсинь, өдр болһн ямаран өлг-эд болн нань чигн тоот олзлҗ йовсинь һәәхүлд үзүлнә.
Атырауд хальмг келн-улсин авъясмудла таньлдулх тоот орулгдв. Келн-улсин хувцн, бурхн-шаҗна олн шүтән, көгҗмин зевсгүд, герин бәәцд олзлҗ йовсн өлг-эд болн ааһ-сав, нань чигн тоот хасгин хәләһәчнрин оньгт тусхагдв.
Кезәнәс авн хальмгуд эврә җирһлдән олзлҗ йовсн тоотла зергднь урн һарин эрдмин кегдлмүд чигн энд орман олв. Бурхн Багшин номд шүтҗ йовдг хальмгудын җирһлд шаҗна эн ном ямаран ик чинр зүүҗ йовхинь олн-зүсн шүтән болн нань чигн тоот ил кевәр герчлв. Һәәхүлд ирсн әмтн хальмг көгҗм болн ду соңсв. Хальмгудын бәәдл-җирһлин туск фильм хәләһәд, һәәхүлд ирсн әмтн өөрд-хальмгудын тууҗ ямаран соньн болҗахинь медв.
«Нүүдл улсин делкә» гидг төсв «ВТБ Страна» гидг буйнч седклин саңгин марһанд диилвр бәрсмн. Атырауд секгдсн һәәхүл сойлын халхар залһлда бәрлһнд туслснь лавта.

ҖИРҺЛИН Кермн

Видео