Бичкдүдин амрлһн соньн болдгар

Сегодня, 16:01 | Общество, Таңһчин зәңгс, Зіњг

Зуни цаг ирәд, сурһулин кем төгсхлә күүкд гертән эс гиҗ элгн-садн талан одад, һолын эс гиҗ нам теңгсин көвәд амрна. Кесгнь таңһчин бичкдүдин болн арвтнрин лагерьмүдт амрад, эрүл-мендән батрулҗ сергмҗтәһәр цаган давулна.
Хальмг ик сурһулин профилакторийин улд бүрдәгдсн «Җаңһр» лагерь кесг җилин туршарт бичкдүдиг болн арвтнриг цуглулна. Ода энд хойрдгч селгән эклсн бәәнә. Терүнә йовудын тускар лагерин һардач Шамакан Дорҗ маднд келҗ өгв: «Хойрдгч селгәнә амрлһна кем Хальмг ик сурһулин номин баһ академин болн «Движение Первых» җисәнә дөңгәр бүрдәгдв. Күүкд-көвүдин төлә соньн марһас, керг-үүлдврмүд давулгдҗана. Дәкәд болхла эдн хоорндан улм өөрхнәр таньлдхин төлә эврә сән дурар үүлддг улсин кергүдт орлцна. Тер тоод эдн бичкдүдин үүдәлтин бәәшңгин бассейнд өөмәд, эрүл-мендән батрулна. Хотл балһсна талвңгудт болдг нааддт орлцад, балһсна тууҗин тускар урднь соңсад-медәд уга соньн тоотла таньлдна. Тиим наадн күүкдт таасгдна, тегәд селгән болһнд соньн керг-үүлдврмүд бүрдәгднә».
Тер мет күүкд «Движение первых» җисәнә волонтермудын үүлдврт орлцна. Хальмг ик сурһулин дацңгудын элчнр күүкдт, хамгин түрүнд ах классмудын арвтнрт дацңд ямр эрдм дасч болхин тускар келҗ өгнә. Тиигәд күүкд өдр болһн гилтә эсвин кичәлд орна, сурһульд авсн эрдмән эдн сергәнә.
Нег-негнләһән таньлдлһна керг-үүлдврт баг болһн орлцна, цергә керг-үүлдврин ветеранмуд эднлә харһна. Одахн лагерьт амрчадг күүкд ветеран Нахошкинә Мингияна цергә үүлдврин туск келвринь соңсад, баатрла улм өөрхнәр таньлдв.
Ик сурһулин оютнр вожатнрар көдлҗ дамшлт хоршадгнь темдгтә. «Мини эгчнр вожатнрар көдлҗәлә, тегәд теднә үлгүрәр бас эн эрдм дасх санан үүдв. Бичкдүд маднд цань угаһар иткнә, тернь нанд хамгин икәр таасгдна. Күүкд-көвүд сергмҗтәһәр амрад, марһаст шунмһаһар орлцна, билг-эрдмән үзүлнә. Бидн күүкдиг соньмсулхар шуннавидн», - гиҗ 4-ч багин вожат Увшан Виолетта келнә.
- Сурһульд сурчасн цагтан би бас лагерьт амрлав, тер кемд нанд вожатын эрдм таасгдв. Күүкдин заң-бәрцинь медәд, тедниг хамцулх керг күцәнәв. Күүкд лагерин бәәдл-җирһлд шунмһаһар орлцна, эдн эврәннь шунлтта заң-бәрцән үзүлҗ шин медрл хоршахар седнә», - гиҗ 2-ч багин вожат Чален Энкира ухан-тоолврарн хувалцв.
Тиигҗ бичкдүд болн арвтнр «Җаңһр» лагерьт хоорндан үүрлҗәнә, эрүл-мендән батрулҗ цаган тустаһар давулна. Профилакторийин эмчнр болн көдләчнр эднә эрүл-мендинь бүрткәд, кергтә эмнлһ кенә. Нааран ирх седклтә күүкд баһ биш, зәрмнь нам хойрдгч селгәнд амрхар чигн седнә.
ТҮРВӘН Һуна

Видео