Эрүл-менд харлһна көдләчнриг магтҗ ачлв

Сегодня, 16:22 | Общество, Таңһчин зәңгс, Зіњг

Шидр Элстд эрүл-менд харлһна көдләчин Өдрт нерәдсн байрин хург болв. Хальмг Таңһчин Толһачин һардврин ахлач Кирилл Попов, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлачин негдгч дарук Цернә Эрднь эрүл-менд харлһна көдләчнриг йөрәһәд, кеҗ-күцәҗәдг керг-үүлдвринь үнлҗ темдглв.
Хургин эклцәр Хальмг Таңһчин эрүл-менд харлһна министр Саран Булат таңһчин эмнлһсиг шинрүллһнә, кадрмуд белдлһнә, эмәр тетклһнә болн нань чигн талдан чинртә төрмүд яһҗ хаһлгдҗахин тускар тооцаһан өгв. Эндр таңһчин эмнлһст 1 миңһн һар эмч болн 2 миңһн һар дунд медицинск мергҗлт көдлҗәнә. Хальмг Таңһчин Толһачин седвәрәр болн дөңгәр Т.Хахлынован нертә медицинск колледжд таңһчин эмнлһсин төлә кадрмуд белдлһнә туст ирлцңгү төсв күцәгдҗәнә. Таңһчин эрүл-менд харлһна бүрдәцслә бооца батлад, баһчуд сурһуль сурад, хөөннь көдлмшәр теткгдх болв. Эн төсв күцәлһнд ода деерән 600 оютн орлцв. Б.Б.Городовиковин нертә ик сурһульд эмчин эрдм дасхдг дацң секгдв, ода 150 күүкн-көвүн тенд сурчана. Тер мет таңһчин эрүл-менд харлһна министерствин даалһврар орн-нутгин ик сурһульмудт 200 күн сурчана. Нидн 17 баахн мергҗлт таңһчин эмнлһст дамшлт хоршаҗ көдлдг болв. Городовиковск болн Яшалтан райодын һардвр бәәрн эмнлһст ирҗ көдлҗәдг баһчудыг урмдулҗ 200 болн 300 миңһн арслңга дем өгнә. Тиигәд, нидн Городовиковск районд - 4 болн Яшалтан района эмнлһст 8 эмч ирв. Цуг эн керг-үүлдврмүд эрүл-менд харлһна көдләчнриг урмдулҗахнь лавта гиҗ министр темдглв.
Эн җил дәәнә ветеранмудын госпиталь экләд көдлв, удл уга Приютна районд шин поликлиник секгдхмн. Таңһчин социальн-экономическ делгрлтин көтлврин йовудт «Цусна төвд» бат ясвр кегдв, шин кергсл углҗ тәвгдв. Үстин района эмнлһнд болн поликлиникд бас бат ясврин көдлмш төгсәд, сән кец-таал тогтагдв, 1970 җиләс авн шинрүлгдәд уга кергслин ормд өдгә цага КТ-аппарат тәвгдв. Эн җил балһсна поликлиникд, Баһ Дөрвдә болн Ик Буурла райодын эмнлһст бас бат ясврин көдлмш эклхмн. 2030 җил күртл цуг наадк райодын эмнлһс бас өдгә цагин некврлә ирлцүлҗ ясгдхмн гиҗ зуралгдҗана.
Сән авъяст тохрсар, олн җилин эргцд эрүл-менд харлһна халхар үнн-чик седклтәһәр көдлҗ, үүрмүдтән үлгүр-үзмҗ болдг көдләчнрин ач-тус темдгләд, өөдән ачлврмуд бәрүлҗ өггднә. П.Жемчуевин нертә таңһчин эмнлһнә 45 көдләч (зургт) орн-нутгин болн таңһчин ачлвр авв. Артан Антонина, Татьяна Брежнева, Шевгән Раиса, Хотуна Кеемә, Васькән Харла болн Кокун Геннадий Әрәсән эрүл-менд харлһна йилһән сән көдләчин темдгәр ачлгдв, эмчнр Бадмин Нина, Харашкинә Эльза болн Оджан Чимид Хальмг Таңһчин ачта эмчин нер зүүв. Дәкәд кесг көдләчнр Әрәсән эрүл-менд харлһна министерствин, Хальмг Таңһчин залврин Күндллһнә һашгудар ачлгдв.
Т.Хахлынован нертә медицинск колледжин болн таңһчин нертә артистнр эрүл-менд харлһна көдләчнриг бас йөрәһәд, билг-эрдмәрн байрлулв.
ДООҖАН Наталья

Видео