Цаһан Амнд соньн соңсхвр белдв

Сегодня, 16:27 | Общество, Таңһчин зәңгс, Зіњг, Бурхн-шаҗна төрәр

Цаһан Амнд соньн соңсхвр белдв.
«Горизонт приключений» гидг соңсхвриг әмтн даңгин соньмсч хәләнә. Тиигәд энүг белддг баг шидр Хальмгт ирсмн. Эдн дарани соңсхврт орх тоотыг Цаһан Амн селәнд цокч авв.
«Ред Медиа» компаня нилчәр эн йовлһн бүрдәгдв. Үстин РМО-н һардвр болн «Ламрим Чой Корлинг» шаҗна бүрдәц эн седвәриг дөңнв.
Әрәсән олн регионмудын сойлын болн йиртмҗин өвәрц тоотыг үзүлхәр эн төсв күцәгдҗәнә. Әмтн зуульчлад иигәрән ирх, урднь медгдәд уга олн бәәриг үзүлҗ- медүлх төр төсвин түүрвәчнр хаһлҗана. Эн соңсхвриг һардҗ давулдг Станислав Румянцев, эрдмәрн артист, зуульчлхдан дурта күн мөн. Зуульчллһнд туста шин бәәр хәәлһнә туст Станислав йир эвтә болдгинь телехәләһәчнр сән меднә.
Цаһан Амнд эднә баг бәәрн хурлд ирәд, цугинь шинҗлҗ хәләһәд, цугинь цокч авв. Шаҗнд шүтдг әмтнә бүрдәциг һардҗадг Хуншан Галина хурлын тускар гиичнрт келҗ өгәд, тууҗинь тодлулад, хальмгудын оюни болн шаҗна авъясмудла ирсн гиичнриг таньлдулв.
Хурлын ах багш өрүни мөргүл давулсиг телесоңсхврт орулхар эдн цокч авв. Ах багш цуг сурврмудт цәәлһвр өгәд, хурлын үүлдврин тускар тодрхаһар келҗ өгв. Гиичнр кергтә цуг көдлмшән кеснә хөөн эдниг хальмгудын авъясар халун җомбаһар болн боорцгар тооһад һарһв.
Дарунь гиичнр керм деер Иҗл һолар йовад, зургуд цокв. Хальмгин ке-сәәхн тоот, Иҗл һолар усчлһн болн нань чигн олн тоот телеүзлин көдләчнрт таасгдв. Урднь батлсн зураһар эдн Әәдрхн балһснд одх бәәсмн, зуг үзсн тоот эднд икәр таасгдад, зураһан соляд, цааранднь чигн Хальмгт зургуд цокч авхар шиидв. Тиигәд эдн Яшкуль, Адг селәдт «Бумбин орн» гидг келн-улсин паркд кесг зургуд цокч авад, нүүдл улсин бәәдл-жирһллә өөрхн таньлдв.
ҖИРҺЛИН Кермн
Зургт: «Горизонт приключений» соңсхвр белддг баг

Видео