Олна шинҗләчнрин дааврта үүлдвр

Сегодня, 13:26 | Общество, Таңһчин зәңгс, Зіњг

Шидр Краснодар балһснд олна шинҗләчнриг белдлһнә болн суңһврин йовудыг дигтә-даратаһар давуллһна төрәр «төгрг ширән» сүүр болв. Краснодарск крайин Олна палатын ахлач болн олна бүртклһнә бәәрн штабин һардач Любовь Попова сүүриг һардҗ давулв. Хальмг Таңһчас суңһврин йовудыг бүртклһнә олна штабин гешүд ниигмин сүлҗәнә эв-арһар сүүрт орлцад, хәләгдсн төрмүдәр ухан-тоолврарн хувалцв.
Хальмг Таңһчин Олна палатын ахлач, олна бүртклһнә штабин һардач Мучан Батыр суңһвр угтҗ таңһчин цуг райодын муниципальн бүрдәцст олна шинҗләчнриг белдлһнә керг-үүлдвр давулгдсиг темдглв. Таңһчин олнд зәңгллһнә эв-арһсин бүрдәцслә хамдан худл-хов зәңг тархалһнас хөрлһнә туст давулгдсн көдлмш сүүрт орлцачнриг соньмсулад, эн дамшлтыг өргнәр олзлх кергтә гиҗ келгдв.
«НОМ» олна ниицәнә ахлач, Әрәсән Президентин медлд үүлддг иргнә олна делгрлтин болн күүнә зөвин хүүвин гешүн Александр Брод регионмудын хоорндк нөкцлт болн дигтә-дарата көдлмш туста болҗахиг онц темдглв. ЮФО-н регионмудын элчнр суңһврт белдлһнә йовудт хоршасн дамшлтарн хувалцҗ, күцәсн көдлмшин ашинь диглв. Сүүрт орлцачнрин темдглсәр, суңһврин йовуд ил кевәр давулгддгиг әмтн үнлҗәхиг тоод авад, олна бүртклһнә чинриг өөдлүлх кергтә болв.
БАТАН Сәәхлә

Видео