Хальмг нерән өргҗ йовдг билгт

Сегодня, 12:26 | Общество, Таңһчин зәңгс, Зіњг

Ноха сарин 3-д ТНТ телеүзлд «Коп-звезда» гидг нертә шин сериал олн хәләһәчнрин оньгт тусхагдв. Терүгинь режиссёр Виталий Дудка белдҗ тәвсмн. Фильмд хальмг артистк Көкән Марина (зургт) наадснь темдгтә болв.
Артистнр Никита Панфилов болн Анастасия Красовская фильмд һол дүрмүдиг бүрдәҗәнә. Полицейск әңгд хамдан көдлҗәдг улсин дүрмүдиг эдн үзүлҗәнә. Эн фильмд нег һазра мана күүкн, Хальмг Таңһчин ачта артистк Көкән Марина наачахиг үзхвидн. Элст балһснд өсч-боссн Марина билг-эрдмин Воронежск шаңһа академьд сурсн болдг. Хальмг артистк болн режиссер Көкән Марина кесг арвн төсвин түүрвәч болҗана.
ТНТ телеүзлд һарсн полицейск үүлдврин туск шин фильмд «Коп-звезда» хальмг артистк билгтәһәр дүр үзүлҗ, олн хәләһәчнрин оньг авлсна тускар «Московский комсомолец» газетд бичгдв.
Талдан артистнрин тогтасн дүрмүд дунд хальмг артисткин бүрдәсн дүр төрүц геедрҗәхш. Дүрин заң-авциг болн онц чинринь Марина нәрн кевәр, оньг авлҗ үзүлҗәнә. Бидн, телехәләһәчнр, сән кино үзҗ, эврә һазра билгтә артисткин эрдминь үнлҗәнәвидн. Альд йовв чигн хальмг нерән өргҗ йовдг нег һазра мана билгт бахмҗта үүлдврәрн ончра.
ҖИРҺЛИН Кермн

Видео