Олн дунд тоомсрта

13-08-2026, 12:15 | Общество, Таңһчин зәңгс, Зіњг

Дорҗин Владимир олн җилдән Октябрьск района бүрдәцст үнн-чик седклтәһәр көдләд, ачта амрлһнд һарсн бийнь олна бәәдл-җирһлд шунмһаһар орлцҗ йовна. Сүл җилмүдт эн района ветеранмудын хүүв һардҗана. Тер мет Владимир Шардаевич таңһчин медәтнрин Хүүвин гешүн бәәсмн. Эн сарин эклцәр Дорҗин Владимир 85 насна өөнән темдглв. Олн элгн-саднь, таньл-үзлнь, хамдан көдлҗ йовсн үүрмүднь медәтиг ончта өөнләнь йөрәв.
Дорҗин Владимир мана ах үйин улсла әдл бичкндк цагтан дәәнә болн тууврин күнд-күчр зовлңгиг дааҗ һарсмн. Хальмг улсиг цааҗла харһулад, хол Сиврүр нүүлһсн цагт эцкнь дәәнә һалд залу-зөрмг кевәр дәәлдҗ йовсмн. Келхд, Дорҗин Шарда 1945 җилд Москва балһснд Диилврин парадт орлцсн һурвн хальмгудын негнь болна. Дәәнә хөөн Шарда Манджиевич өрк-бүлән Алтан крайд олҗ авад, тоочар колхозд көдлв. Зуг дәәнә цагт авсн шавнь зоваһад, 1953 җилд эцкнь сәәһән хәәв. Владимир сурһульд орад, тенд 7 класс төгсәсмн. Цааранднь 8-ч класст сурхин төлә өрәл җилд 75 арслң өгх кергтә бәәсмн. Тиим мөңгн экднь уга болад, арвн дөрвтә Володя колхозд экләд көдлв, мөрн тергәр буудя, өвс зөөдг билә. Хөөннь колхозин ахлач энүнд үс зөөдгиг даалһв. Йисн дууна һазрт көвүн өдр болһн үс зөөһәд, дүүнрән асрхд экдән нөкд болв.
Хальмг улсин нер цеврләд, төрскн һазрурн нүүх зөв өгхлә, Дорджиевихнә өрк-бүл бас гер талан темцв. Энд Владимир киномеханик болҗ көдлв. Хөөннь эн Аһш балһснд гидромелиоративн техникумд сурад, цергт мордв. Әәрмин хөөн эн Октябрьск районд залһлдана әңгд көдлв, хөөннь энүг «Ик Царң» совхозин комсомольск бүрдәцин сегләтрт суңһв. Дорҗин Владимир Баһ Дөрвдә районд чигн көдлв. Октябрьск район бүрдәгдхлә, Владимир Шардаевичиг района селәнә эдл-ахун көдләчнрин профсоюзин ахлачин үүлд батлв, «Калмыцкий» совхозд партин халхин көдлмшт авв. Ачта амрлһнд һартлан хөрн тавн җилдән эн района залһлдана әңгин һардачар көдлсмн. Олн җилдән үнн-чик седклтәһәр көдлсн төләдән эн СССР-ин Деед Советин Президиумин шиидврәр «Күч-көлснә туурмҗин төлә» медаляр ачлгдсмн. Тер мет төрскн таңһчин делгрлтд ик ач-тусан күргсн төләдән Дорҗин Владимир «Хальмг автономин 100 җил» болн «Хальмгин АПК-н 100 җил» гидг медальмүдәр ачлгдснь ик бахмҗта болна.
Владимир Шардаевич Людмила Ивановна авальтаһан җирн шаху җилдән ниитә бәәнә. Шахтинск багшнрин ик сурһуль төгсәснә хөөн хальмг һазрт көдлхәр ирсн баахн Валентина Дорҗин Владимирла ханьцад, өркән өндәлһв. Эндр һурвн үрнь болн олн ачнр-зеенрнь медәтнрин төлә байр-бахмҗ үүдәнә. Людмила Ивановна олн җилдән Ик Царң селәнә дунд сурһульд багшлв, района дегтрин саңгиг һардв. Олн җилдән ниитә бәәһәд, күүкдтән чик сурһмҗ өгсн төләдән Дорджиевихн «Дурна болн итклин төлә» медаляр ачлгдсмн.
Дорҗин Владимирин 85 насна өөнд нерәдәд Ик Царң селәнд байрин керг-үүлдвр болв. Района ветеранмудын хүүвин ахлачиг йөрәхәр кесг гиичнр ирв. Октябрьск района толһачин дарук Нүдлчин Кеэма, Хальмг Таңһчин ветеранмудын Хүүвин ахлачин үүл дааҗадг Тавлян Любовь, Элст балһсна ветеранмудын олна бүрдәцин ахлач Тихона Надежда Владимир Шардаевичиг авсн наснлань йөрәһәд, хөв-кишг дурдв. Дәәнә, күч-көлснә болн дотр-дундын кергүдин ветеранмудын олна бүрдәциг чадмг кевәр һардҗ күцәмҗтәһәр үүлдҗ йовх төләднь Дорҗин Владимирт Әрәсән ветеранмудын бүрдәцин темдг болн таңһчин хүүвин Күндллһнә һашг бәрүлҗ өгв.
ДООҖАН Наталья

Видео