Дииләчнрин тоод орв

Сегодня, 13:10 | Общество, Таңһчин зәңгс, Зіњг

«Ик завср» марһана ашлгч девсңд орлцачнр Әрәсән Президент Владимир Путинлә харһв, тедн дунд Хальмг Таңһчин элч, Баһ Дөрвдә гимназин сурһульч Хойна Аделина (зургт) билә.
Ноха сарин эклцәр Красноярск балһснд «Ик завср» гидг Цугәрәсән VII марһана 5-7-ч классмудын сурһульчнрин хоорнд болсн ашлгч дөрлдән төгсв. Әрәсән кесг регионас болн һазадын орн-нутгудас ут-тоодан 800 сурһульч энүнд орлцв, болв эднәс зуг 300 күн нүүрт һарв. Көвүд-күүкд марһана кесг даалһвр күцәһәд, медрлән, үүдәгч эв-арһан, хамдан көдлдг болн эврә төсв үүдәҗ чаддган үзүлв.
Баһ Дөрвдә Бадмин Батан нертә гимназин 6-ч «а» классин сурһульч Хойна Аделина Цугәрәсән марһанд Хальмг Таңһчиг элчлв. Марһана цуг девсңгин неквриг сәәнәр күцәһәд, Аделина 5-7-ч классмудын арвтнр дунд хойрдгч орм эзлв. Ашлгч девсңд һарсн бичкдүдин төлә сурһуль-эрдмин ик көтлвр бүрдәгдв, эдн дамшлтын кичәлмүдт, керг-үүлин нааднд орлцҗ, Цугәрәсән марһана мергҗлтнрлә болн шинҗләчнрлә харһв. Красноярск крайин тууҗла, сойлла таньлдад, күүкд-көвүд соньн бумблвс һәәхв.
Марһана ашлгч девсңд диилвр бәрсн Хойна Аделина «Күсл болсн зуульчллһнд» орлцҗ, поездәр Москваһас авн Владивосток күртл йовҗ, эң-зах уга мана орн-нутгиг хәләҗ, нертә кесг улсла харһхмн. Аделинаг болн терүнә сурһмҗлгчнриг өөдән күцәмҗлә йөрәҗәнәвидн.
Красноярск балһснд бәәсн кемд Аделинаг болн диилвр бәрсн нань чигн сурһульчнриг Әрәсән Президент Владимир Путин йөрәв. Тиим седвәртә, билгтә күүкд иргчдән орн-нутгиг залх гиҗ Владимир Владимирович онц темдглв. Җирһлин йоста керг олсн ухата, гүн медрлтә көвүд-күүкдлә харһсндан бахмҗта бәәхән орн-нутгин толһач онц темдглв.
Аделинан тускар маднд терүнә классин һардач Эрднин Галина келҗ өгв. Галина Сергеевнан үгәр, эднә класст 26 күн сурна, цугтан хоорндан ниитә бәәнә. Аделина сурһулин болн классин олна кергүдт шунлттаһар орлцна. Цергә шишлң керг-үүлдврт орлцачнрт эдн талдан сурһульчнрла хамдан буйнч седклин демән күргнә.
Аделина көгҗмин сурһульд сурна, зургуд зурна, района болн таңһчин бәәтхә, орн-нутгин уйн наста зурачнрин марһаст күцәмҗ бәрҗ нер һарна. Күүкн одахн «Артек» лагерьт амрад ирлә. «Ик завср» марһанд орлцхар шиидәд, бийиннь туск бәрмт цаасиг болн нань чигн кергтә тоотыг марһана бүрдәһәчнрт йовулла. Терүнә өмн Цугәрәсән марһана кесг девсңгин ашар йилһрсн Аделинаг «Ик завсрт» орлцх үрвр кесн билә. Марһанд белдхд энүнд экнь Анна Фиделевна дөң болад, Красноярск балһснд дахад одв. Аделина «Движение первых» болн волонтермудын җисәнд шунлттаһар орлцна, гиҗ Галина Сергеевна йосндан бахтв.
Төрскн келән чигн Аделина сәәнәр меднә, ээҗ-аавнь энүнд дөңгән күргнә. Красноярскд йилһрсн Аделинад болн Баһ Дөрвдә гимназин билгтә сурһульчнрт улм өөдән күцәмҗ бәрҗ, төрскн келән сәәнәр дасч, района болн таңһчин нер туурулҗ йовтха гиҗ дурдҗанавидн.
ТҮРВӘН Һуна

Видео