Баһ орута улсин зөвинь харсхар

Сегодня, 13:13 | Политика, Общество, Таңһчин зәңгс, Зіњг

«Җалв болн пенсь» гидг төрәр «Справедливая Россия» партин Цугәрәсән хург цуг регионмудар, тер тоод Хальмг Таңһчин хотл Элстд болв. Энүнд партин таңһчин әңгин ахлач Наталья Зинченко, «Дари Добро» гидг буйнч седклин Хальмг олна саңгин һардач Эльза Шамова, партин таңһчин әңгин хүүвин гешүн Адъяна Заяна болн Хальмг Таңһчд күүнә зөв харслһна төрәр үүлддг күцц зөвтә элч Валерий Чуб үг келҗ таңһчин седкүлчнрин сурврмудт хәрү өгв.
- Орн-нутгт эд-таврин үн 30 процентд өөдлв, терүнәс көлтә хамгин түрүнд бичкн пенсь болн бичкн җалв авдг әмтн зовлңта бәәнә. Тегәд чигн «Справедливая Россия» парть пенсиг дундын җалвин кемҗәнәс 40 процентд өөдлүлх кергтә гиҗ неквр тәвҗәнә. Тер мет 13-ч пенсь баһ орута медәтнрт өгхин туст селвгән орулв, - гиҗ Наталья Зинченко нүр үгдән темдглв.
Күч-көлс шаңнлһна баһ гисн кемҗә өөдлүллһнә туск неквр бас тәвгдҗәдг болна, эндр болхла кергтә эд-тавр болн эм хулдҗ авхин төлә баһ гиснь 45 миңһн арслң кергтә. Хамгин түрүнд баһ тетквртә әмтнд килмҗән тусхах кергтә гиҗ келгдв.
Пенсионермүд цергә керг-үүлдврт орлцҗадг дәәчнрт дөң болна, Әрәсән Президентин үүлдвриг чигн дөңнҗәнә. Тегәд эдн сән пенсь авч, сән таалд бәәх зөвтә. Көдлдг улст бас оньган өгх кергтә. Баһ тетквртә улст 13-ч җалв өгх кергтә гиҗ бас темдглгдв.
Хургт орлцачнр тер мет нилхән хәләҗәдг күүкд улст бас җалвинь өгх кергтә, селән һазрт баһчудт социальн бооца батлдг арһ өгхмн гиҗ келгдв.
ТҮРВӘН Һуна

Видео