Нарт-делкән һәәхүлд орлцхмн

Сегодня, 12:58 | Общество, Таңһчин зәңгс, Зіњг

Малайзийд зуульчллһна төрәр болх нарт-делкән һәәхүлд Хальмг Таңһч орлцҗ, бәәрн улсиг хальмг улсин сойлла таньлдулхмн. Ноха сарин 18-әс авн 20 күртл болх тер һәәхүлд Хальмг Таңһчин зуульчллһ делгрүллһнә төрәр үүлддг агентств Азиатск- Тихоокеанск региона хамгин ик гисн һәәхүлд орлцҗана.
Зуульчллһна туст ик чинртә һәәхүл PATA Travel Mart 2026 гиҗ нерәдгднә. Малайзиян Кучинг балһснд тер давхмн.
Хальмг Таңһчин Толһачин даалһврар таңһчд зуульчнр ирлһнд болн Хальмгин зуульчллһиг нарт-делкән кемҗәнд һарһҗ үзүлхд һол оньг тусхагдхмн. Зуульчллһиг делгрүллһнә агентств таңһчин сойлын болн «Обитель святых» гидг нертә зуульчллһна төсв белдсмн. Discover Russia келн-улсин зуульчллһна хамгин нер һарсн төсвсин тоод орсмн.
Нарт-делкән эн һәәхүлд Хальмг Таңһч зуульчллһна халхар таңһчд бәәдг тоотыг үзүлхәр белдв. Бурхн-шаҗна үүлдврлә залһлдата әрүн кесг бәәр, йиртмҗин өвәрц бәәдл, келн-улсин авъясмуд һәәхүлд ирсн улст соньн болхнь лавта. Әрәсән арвн региона 30 һар бүрдәц эн һәәхүлд орлцҗана.
Һәәхүлин көдлмш һурвн өдрин йовудт Хальмгин делегац олн харһлтст орлцҗ, талдан һазрин бүрдәцслә керг-төрин халхар күүндхмн. Азиатск-Тихоокеанск һазрин зуульчллһна үүлдврлә таньлдх арһ бас учрҗана. Энткгин, Негдсн Арабск Эмиратмудын, Малайзиян болн нань чигн орн-нутгудын элчнрлә харһхар чигн зуралҗадг болна.
«PATA Travel Mart - 2026» һәәхүлд орлцлһн зуульчллһна халхар шин бооцас батлҗ, нөкцлтән делгрүлхд туслхнь маһд уга.
ХӨӨЧИН Галина

Видео