Уйн наста дәәчнр дамшв

Сегодня, 13:04 | Общество, Таңһчин зәңгс, Зіњг

Целинн районд бәәршлҗәдг «Сайгачонок» лагерь олнд темдгтә. Цөөкн җилин эргцд лагерь көдлҗәсн уга, яһад гихлә энд тосхлтын болн бат ясврин көдлмш кегдв.
«Давсн җиләс авн лагерь урдк кевәрн көдлҗәнә. Ода энд бичкдүдин амрлһна төлә өдгә цага сән таал тогтагдв. Гер болһнд 56 күүкн-көвүн бәәҗ чадҗана. Ода лагерьт 100 күн амрчана. Һурвдгч селгән ноха сарин 4-д эклв. Арвтнрт энд таасгдна, вожатнр бүрдәдг кесг керг-үүлдврт эдн орлцна»,- гиҗ лагерин һардач Шарапа Айса келнә.
Элстин багшин колледжин, Пятигорскин болн Москван ик сурһульмудын оютнр зуни цагт вожатнрар көдләд, сурһмҗлачин дамшлтан байҗулна. Оютнрин келсәр, арвтнрла көдлхд амр биш, тиигсн бийнь эдн олн зүсн төрәр соньн харһлтс, керг-үүлдвр бүрдәдгиг дасад, колледжд болн ик сурһульд багшнрнь заасн медрл олзлна.
Тер мет лагерьт цергә-спортын белдврин болн төрскнч сурһмҗин «Дәәч» төвин мергҗлтнр баһчудла көдлнә. Эдн цуһар цергә шишлң керг-үүлдврин орлцачнр болн ветеранмуд болна, тегәд дорас өсч йовдг баһ үйнриг сурһҗ, медсән заана. Хальмг Таңһчин баһчудас нань Ростовин мүҗин арвтнр энд амрад, цергә дамшлт авна. Ода эн сарин эргцд эдн цергә дамшлтын кичәлмүдт орлцад, цергә зер-зев яһҗ олзлхинь медҗ авна, хоорндан дөрлднә. «Тиим дөрлдән маднд таасгдна. Автомат цуглулхд амр биш. Болв «Дәәч» төвин мергҗлтнр маднд цугинь дигтә-даратаһар үзүләд цәәлһнә», - гиҗ арвтнр келнә.
Лагерьт амрчадг сурһульчнр спортын болн төрскнч сурһмҗин керг-үүлдврт орлцна. Ода эн селгәнә чилгчәр эдн эв-дован, дассн медрлән, дамшлтан үзүлхмн, күн болһн иткл цаас авхмн.
Дөчн җилдән бичкдүдиг болн арвтнриг хамцулҗадг «Сайгачонок» лагерьт күүкд-көвүд соньнар амрна. Спортын талвңгудт эдн цогц-махмудан батрулна, цергә медрл болн түргн дөң күрглһнә эв-арһ дасч авна. «Сайгачонок» лагерьт болдг кесг харһлтст нертә артистнр, номтнр, спортсменмүд орлцна. Эдн мана таңһчин тууҗин, сойлын зөөрин, эврә үүдәлтин, спортын күцәмҗин тускар келҗ өгнә. Тер тоод өөрхн иргчд мана таңһчд алдр «Җаңһр» дуулврт нерәдсн олна байр өргнәр темдглгддг болхмн гиҗ гиичнр келв. Эдн сергмҗтәһәр амрсн деерән бийдән туста шин медрл хоршав. Зуни амрлһна өдрмүдән эн лагерьт давулсн бичкдүд кесг үүрмүдтә болсндан чигн байрлна.
ТҮРВӘН Һуна

Видео