Тывад болх шар шаҗна ик хург

Сегодня, 13:12 | Общество, Таңһчин зәңгс, Зіњг

Тыва Республикд ноха сарин 17-ас авн 20 күртл шар шаҗна үүлдәчнрин нарт-делкән ик хург болхмн. Бурхн Багшин номд шүтдг делкәд бәәдг олн улсин элчнр иигәд дөрвдәд Әрәсән һазрт цуглрҗ ирҗәнә.
Эн өдрмүдт Тыван Кызыл хотл балһснд цуглранд орлцх делегацс болн волонтермуд ирҗәнә. Әрәсән олн һазрин элчнрәс нань Шри-Ланкан, Энткгин, Китдин, Моңһлын, Непалын, Таиландын, Мьянман болн нань чигн нутгудын делегацс ирҗ, чинртә хургин көдлмшт орлцхмн.
Делегацсин ханьд шаҗна үүлдәчнр, нертә номтнр, олна үүлдәчнр ирҗәхнь темдгтә. Нөкцлт болн иньгллт батллһнд, күмн әмтни цаарандк делгрлтд сойлын чинрин тускар шаҗна үүлдәчнр болн номтнр күүндхмн.
Шаҗна ик хургин йовудт болх олн харһлтс, һәәхүлмүд. Эрмитажин болн Әрәсән нань чигн музеймүдәс көрңгәс авч ирҗ үзүлгдх соньн тоот әмтнә оньг авлхнь лавта. Тер мет 800 күн орлцлһта «Нүүдл улсин делкән дүүҗң» нертә ик наад белдлһнд Хальмгин «Өөрднр» бииһин театр орлцҗана. Хальмгин волонтермуд чигн Кызылд күрсн бәәнә. Ик цуглрана көдлмшин йовудт таңһчин делегац шунҗ орлцхмн.
Тывад көдлмшән эклх шар шаҗна үүлдәчнрин ик цуглрана тускар дарани һарцстан зәңглхвидн.
ХӨӨЧИН Галина

Видео