Мана селәдиг кеерүлхин төлә

Сегодня, 13:27 | Общество, Таңһчин зәңгс, Зіњг

Шидр Москвад балһсна кец-таал тогталһна сән гисн төсвсин Цугәрәсән XI марһана аш диглгдв, энүнә ашар ут тоодан 215 төсв йилһҗ авгдв. Хальмг Таңһчас Баһ Дөрвд, Приютное болн Яшалта селәд дииләчнрин тоод орснь темдгтә. Баһ Дөрвдт «Долина ступ» гидг паркд бурхн-шаҗна бодь суврһс босххмн, Яшалтад бамб цецгүдин талвң тосххмн, Приютное селәнд болхла «Оазис в степи» гидг ке-сәәхн орм тогтахмн.
Хальмг Таңһчин Толһач Хаска Бату таңһчин селәд дииләчнрин тоод орснь ик бахмҗ үүдәв гиҗ темдглв. «Өдгә цага, сән кец-таалта болн һәәхмҗтә ормс тогтахин төлә кеҗ-күцәҗәдг мана көдлмшиг орн-нутгин һардвр өөдәнәр үнлснь лавта. Цуг орн-нутгт балһсна сән кец-таал тогталһиг делгрүллһнә халхар дигтә-дарата көдлмш күцәҗәдг төләднь Әрәсән һардврт , муниципальн бүрдәцст болн нег һазра улст онц ханлтан өргҗәнәв. Таңһчин булң болһн сәәхрәд кеерүлгдхин төлә цаарандан көдлхвидн», - гиҗ таңһчин Толһач Хаска Бату темдглв.
Баһ Дөрвдә районд «Долина ступ» гидг парк тосхгдх болв. Келхд, район түрүн болҗ эн марһанд орлцад, дииләчнрин тоод орснь эднд ик байр-бахмҗ үүдәв гиҗ Баһ Дөрвд селәнә муниципальн бүрдәцин толһач Манҗин Санл келв.
- Эн паркд олн зүсн керг-үүлдврмүд, харһлтс, бурхн-шаҗна йосрхл давуллһна төлә онц ормс бүрдәгдх, спортын кергсл углҗ тәвгдх, тер мет энд кафе, олн зүсн лавкс секгдх. Тегәд селәнә әмтнд болн зуульчлачнрт энд эрк биш таасгдх гиҗ нәәлҗәнәвидн. Эн парк «Долина ступ» гиҗ нерәдгдснь хара биш. Энд Манҗр бурхна бумб босхгдхмн. Терүнә эргнд эн һазрт бәәдг арвн болһн эврәннь бодь суврһ босхх. Шаңһа хазнас эн парк тосхлһнд 81 сай арслң йилһгдхмн. Ут тоодан болхла энүнә тосхлтд 170 сай арслң һарһгдхмн, тегәд арһлачнр бас демән күргхмн. Шин парк зуульчллһ делгрүллһнд эрк биш туслх гисн нәәлвр бәәнә. Аһш Элст хоорндк хаалһар йовдг олн-әмтн энд зогсад, мана улсин тууҗла, сойлла таньлдх. Бәәрн арһлачнр эврәннь кергән делгрүлсн деерән көдлмшч шин ормс бүрдәхнь бас тчинртә, - гиҗ Санл Викторович келв.
Приютное селәнд района сойлын Герин өөр «Оазис в степи» гидг бәәр тогтахар зуралҗана. Энд әмтн өрк-бүләрн цаган сергмҗтәһәр давулхин төлә сән таал тогтахмн. Приютна района толһач Басң Манжиковин келсәр, Цугәрәсән марһанд диилвр бәрсн йовдл ик байр үүдәв. Энтн цуг Хальмг Таңһчин ик күцәмҗ мөн. Мана төрскн һазр улм сәәхрәд-кеерәд йовхнь маһд уга. Эн төсв белдсн улст ханлтан өргҗәнәв, - гиҗ района толһач келв.
Яшалта селәнә төсв бамб цецгт нерәдгдснь бас учрта. Эн һазрт хаврин кемд олн зүсн өңгтә бамб цецгүд урһдг арл бәәнә. Җил болһн ирлцңгү наадмд олн гиичнр нааран ирнә. «Бамб цецгин наадмд ирсн гиичнр, бәәрн улс секгдх шин талвңд амрхин төлә сән таал тогтагдхмн. Мана төсвиг марһана жюри өөдәнәр үнләд, өдгә цага сән таал тогталһнд дөң болснь маднд ик урмд өгв. Эн төсв күцәлһнд ут тоодан 58 сай арслң һарһгдхмн. Олн дииләчнр дунд мана таңһчин һурвн район заагдснь ик бахмҗта болв. Өөрхн иргчд мана төв селәнд шин парк секгдхиг бидн цуһар күләҗәнәвидн», - гиҗ Яшалтан района толһачин үүл дааҗадг Ивана Илья бахтв.
ДООҖАН Наталья

Видео