«Министрин үүл ик дааврта болҗана»

Сегодня, 12:39 | Общество, Таңһчин зәңгс, Зіњг

Хальмг Таңһчин Толһач Хаска Батун зәрлгәс иштә Нахошкинә Мингиян таңһчин социальн делгрлтин, күч-көлснә болн көдлмшәр тетклһнә министрин үүлд батлгдв. Мингиян Владимирович Яшкулин района Хар Толһа селәнд 1980 җилд һарсмн.
Тенд дунд сурһуль төгсәснә хөөн Хальмг ик сурһульд болн Москван экономикин болн зөвин академьд сурсмн. Күч-көлснә хаалһан «Кировский» эдл-ахуд эклв. 2007-2016 җилмүдт Әрәсән зарһин приставмудын цергллтин Хальмг Таңһчд үүлддг заллтын Элст балһсна әңгд көдлсн билә. Хөөннь цергә шишлң керг-үүлдврт орлцад, ах лейтенантын цолта цергч болсмн. 2023 җиләс авн болхла баһчудын цергә-спортын белдврин болн төрскнч сурһмҗин «Дәәч» төвд көдлсмн. «Баатрмуд 08» гидг сурһулин көтлврин орлцач хальмг хазгудын ниицәнә одмна негдгч дарук болн Хальмг Таңһчин Олна палатын гешүн болҗ үүлдҗ йовсмн. Мингиян Владимирович һурвн үртә эцк мөн. «Кавказд церглсн төлә», «Цергллтин төлә» болн Советин Союзин Баатр Делгә Эрднин медальмүдәр ачлгдсмн.
Шидр Хальмг Таңһчин залврин Ахлач Босхмҗин Гилән таңһчин социальн делгрлтин, күч-көлснә болн көдлмшәр тетклһнә министрин үүлд батлгдсн Нахошкинә Мингияниг министерствин көдләчнрлә таньлдулв. Хальмг Таңһчин залврин Ахлачин дарук Өлзәтин Марина эн харһлтд бас орлцв.
Таңһчин залврин Ахлач хамгин түрүнд 13 җилдән министерствиг һардсн Өлзәтин Маринан ач-тусинь онц темдгләд, энүнлә хамдан көдлсн мергҗлтнрин үүлдвриг өөдәнәр үнлв. Хальмг Таңһчин Толһачин зәрлгәс иштә Марина Петровна таңһчин залврин Ахлачин дарук болад, немр даалһвр күцәҗ, чинртә талдан төрмүд хаһлхмн гиҗ Гилән Герасимовна зәңглв. «Шишлң керг-үүлдврин ветеран, «Баатрмуд 08» көтлврт орлцач Нахошкинә Мингиян болхла министрин үүл дааһад, җирһлин дамшлтан болн медрлән олзлад, таңһчин әмтнә социальн харслтын, көдлмшәр тетклһнә төрмүдиг хаһлхмн. Цергә даалһвран күцәснә хөөн таңһчин олна бәәдл-җирһлд шунмһаһар орлцад, медрл - мергҗлтән өөдлүләд ик дааврта үүлд батлгдв. Социальн халхин төрмүд эркн чинртә болна, кен-негнднь килмҗән тусхаҗ, дөң-нөкд болх кергтә. Эндр мана таңһчд шаңһа көтлврмүдин болн келн-улсин төсвсин йовудт олн керг-үүлдврмүд дигтә-даратаһар күцәгдҗәнә. Өнчн болн эрмдгтә медәтнрин гер-интернатд шин бәәрн тосхгдҗана, ах үйин улс ут нас наслҗ, олна бәәдл-җирһлд орлцһна, олн үртә өрк-бүлмүдиг дөңнлһнә төрмүд һол оньгт бәәнә. Тер мет эн җил таңһчин цуг райодт әмтиг көдлмшәр тетклһнә цергллтсин үүлдвр шинрүлгдҗәнә. Социальн делгрлтин министерствиг нурһлҗ күүкд улс һарддг билә, болв таңһчин Толһачин шиидврәр ода танд эн үүл даалһгдв, тегәд сән авъясмудыг хадһлад, көдлмшиг шунмһадулҗ, шинрлтс орулҗ күцәмҗтәһәр көдлмшән күцәтн», - гиҗ Гилән Герасимвона дурдв.
Арвн һар җилдән таңһчин социальн делгрлтин, күч-көлснә болн көдлмшәр тетклһнә министрәр үүлдсн Өлзәтин Марина хамдан көдлсн үүрмүдтән зүркни ханлтан өргәд, әмтнә социальн харслтын халхар цааранднь чигн сән йовудтаһар көдлхинь дурдв. Министерствд көдлҗәдг мергҗлтнрин медрл- дамшлтынь темдгләд, урдк кевәрн цуг халхар дөң-нөкд күргхдән белн бәәхән медүлв.
- Хальмг Таңһчин Толһач Хаска Бату министрин үүл даалһснь ик дааврта болҗана. Фронтд дәәлдәд, цергә даалһвран күцәснә хөөн ода шин керг күцәх кергтә. Социальн харслтын төрмүд кен-негнәннь җирһлд ик чинртә болна, би чигн олн үртә эцк болн цергә керг-үүлдврин ветеран болад шаңһа дем авнав. Ниитә кевәр көдлҗ даалһсн кергиг үнн-чик кевәр күцәх санатав, - гиҗ Мингиян Владимирович үгән өгв.

Тоолвр.
«Министрин үүл ик дааврта болҗана»
ШУРҺЧИН Очр, Хальмг Таңһчин залврин Ахлачин негдгч дарук – таңһчин финансин министр:
- «Баатрмуд 08» көтлврт орлцач Нахошкинә Мингияна сурһмҗлгч болад, дамшлт хоршахднь дөң-нөкд болҗанав. Эн мана министерствд болсн кесг харһлтст, олна керг-үүлдврмүдт орлцснь шин үүлднь туслхнь маһд уга. Таңһчин Толһач цергә шишлң керг-үүлдврт орлцачд иткәд, өөдән үүл даалһснь нег һазра улсин сә хәәҗ ач-тусан күргҗ, күцәмҗтәһәр көдлх гиҗ ицҗәхнь лавта. СВО-н ветеран болсн деерән эн таңһчин хазгудын ниицәнә һардачнрин негнь болна. Мингиян Владимирович көдлмшән үнн-чик седклтәһәр күцәһәд, таңһчин делгрлтин төлә арһ-чидлән нөдлго үүлдх гиҗ санҗанав.
«Министрин үүл ик дааврта болҗана»
МУЧАН Батыр, Хальмг Таңһчин Олна палатын ахлач, «Әрәсән эцкнр» ниицәнә таңһчин әңгин һардач:
- Нахошкинә Мингиянла хамдан таңһчин Олна палатын ханьд көдлвидн. Мингиян Владимирович әмтнлә тевчңгү, үүрсг, цаһан седклтә күн болдгиг сәәнәр меднәв. Таңһчин Олна палат социальн делгрлтин министерствин керг-үүлдврмүдт шунмһаһар орлцҗ, министриг дөңнх. «Баатрмуд 08» көтлврт орлцач шин ормдан күцәмҗтәһәр көдлх гиҗ санҗанав. Дәкәд Мингиян Владимирович олн үртә эцк болад, бичкдүдин билг-эрдм делгрүллһнд, чик сурһмҗ өглһнд ик оньган өгдг төләдән социальн халхин көдлмшиг чадмг кевәр күцәхнь лавта.
«Министрин үүл ик дааврта болҗана»
БАСҢГА Савр, Яшкулин района Хар Толһа селәнә дунд сурһулин һардач:
- Хальмг Таңһчин Толһач Хаска Батун зәрлгәс иштә мана дунд сурһуль төгсәсн Нахошкинә Мингиян социальн делгрлтин, күч-көлснә болн көдлмшәр тетклһнә министрин үүлд батлгдсн зәңгиг бидн байртаһар тосад, көдлмштнь цаһан хаалһ дурдҗанавидн. Мингиян сурһулян сәәнәр сурад, олна нүүрт йовҗ, олна бәәдл-җирһлд шунмһаһар орлцд сурһульч бәәсмн. Эндр чигн эн төрскн сурһулян мартхш, эн хаврар ирәд, «Медрл» олна ниицәнә лектор болҗ сурһульчнрла харһсн билә.

Белдснь ДООҖАН Наталья

Видео