«Бамб цецг» Тывад одв

Сегодня, 09:36 | Общество, Таңһчин зәңгс, Зіњг

Ноха сарин 17-ас авн 20 күртл Тыва Республикд шар-шаҗна нарт-делкән IV ик хург болхмн. Нер һарсн «Бамб цецг» ансамбль ик хург секлһнә байрт орлцад, терүнә йовудт болх керг-үүлдврмүдин йовудт билг-эрдмән үзүлхмн. Шидр ансамблин һардач Катан Савр таңһчин седкүлчнрлә харһад, эн туст тодрхаһар келҗ өгв.
- Нидн мана таңһчд болсн шаҗна нарт-делкән III ик хургин йовудт Әрәсән болн Хальмг Таңһчин залврин дөңгәр «Миңһн байр» гидг наадм болсн билә. Тыва болн Бурять Республикүдин, Моңһлын болн Шинҗәнә нертә ансамбльмуд терүнд орлцла. Ода болхла бидн мана үүрмүдин үрврәр Тывад болх ик хургт орлцхвидн. Кызыл балһсна Арата талвңд мана ансамблин концерт болхмн. Бидн хальмг улсин би биилсн деерән 90-ч җилмүдт мана таңһчд көдлҗәсн нертә биич Вячеслав Донгак тәвсн «Миңһн байр» би үзүлх санатавидн. Одахн гилтә эн сәәһән хәәв, тегәд санлынь тевчәд төрскн һазртнь эн би үзүлхәр зуралҗанавидн, - гиҗ Катан Савр келв.
Темдглхәс, шар-шаҗна ик хургин йовудт Тывад түрүн болҗ һурвн эрдньд көгҗмин белг нерәдгдхмн. Эн керг-үүлдвр мана таңһчд күцәмҗтәһәр давулгдҗадг учрар Катан Саврт терүг һардх үрвр кегдв. Хальмгин болн Тыван көгҗмчнр хамдан терүнд орлцх болв. Шар-шаҗна нарт-делкән ик хургт орлцсна хөөн «Бамб цецг» ансамбль Моңһлд одхмн. Моңһлын нертә артистнрин, тер тоод Җавхлана үрврәр тиигәрән одад, Улан Батор болн Улаангом балһсдт ик концертс үзүлхмн. Моңһлын хотл балһсна Чиңһс хаана талвңд драмин театрт болсн керг-үүлдврт орлцх болв. Улаангом балһснд нүүдл улсин нарт-делкән ик наадм болх. Келхд, мана ансамбль Моңһлд 1972 җиләс авн одад уга гиҗ Катан Савр темдглв.
- Росконцертин дөң-нөкдәр бидн Әрәсәд хальмг улсин сойл, билг-эрдм делгрүлҗәнәвидн. Әрәсән улсин ниицлтин җилд олн келн-улс хоорндан харһад, билг-эрдмән үзүлхнь темдгтә. Һаха сард Әрәсән 7 балһснд одх зура бас бәәнә, - гиҗ Катан Савр келв.
БАТАН Сәәхлә

Видео