Эмчнр дәкнәс хол селәдт одхмн

Сегодня, 14:28 | Общество, Таңһчин зәңгс, Зіњг

Хальмг Таңһчин Толһач Хаска Батун седвәрәр һурвн җил хооран бүрдәгдсн «Эрүл-менд бәәтн!» гидг керг-үүлдвр сән авъяст тохрад, җилд хойр дәкҗ давулгддг болв. Эн хаврар эмчнр таңһчин райодар йовад, хол селәдт бәәдг әмтнд дөң-нөкд болсн билә. Шидр эн керг-үүлдврин дарани девсң Целинн районд эклв. Эмчнр Троицкое болн Найнтахн селәдт одв.
Троицкое селәнд Элст балһсна поликлиникин 5-ч әңг үүлднә, терүг баахн эмч Цернә Гилән һардҗана. Гиляна Владимировнан келсәр, әңгд цуг мергҗлтнр бәәнә, хәрнь П.Жемчуевин нертә таңһчин эмнлһнәс зуг отоларинголог эмч ирв. Селәнәхн өрүһәр эмнлһнд ирәд, УЗИ-н, маммографин болн флюорографин шинҗллтд орад, эмчнрт бийән үзүлв. Хаврар ирлцңгү керг-үүлдврин йовудт эмчнр Овата селәнд одсн билә. Цернә Гиләнән тоолврар иим керг-үүлдврмүд эрк биш кергтә. Хол селәдт бәәдг медәтнрт, шалтгта улст района эс гиҗ таңһчин эмнлһнд күрдг арһ уга болна.
Эн әңгд көдлдг эмч Наталья Шипеева хойр долан хонгт нег дәкҗ Найнтахн болн Чаһрт селәдт одад, әмтнә эрүл-мендин бәәдл шинҗлнә. Найнтахнд фельдшер Манҗин Иван болн медицинск эгч Дарбака Валентина көдлнә, эдн кен-негнднь түргн дөң күргҗ, Наталья Сергеевнала бат залһлда бәрнә. Троицкое селәнд бәәдг Җенгура Иринан экнь нидн гүлгн гемәр гемтв, тегәд күүкнь эмчнрт ирәд, кергтә эминь авна, эмнлһнә халхар селвлцнә. Күүкд күн селәнд үүлддг эмнлһнә эмчнрт ханлтан өргҗ, килмҗтәһәр теткдгинь темдглв. Арбака Людмила болхла эм хулдҗ авхар нааран ирсн бәәҗ. «Эрүл-менд бәәтн!»гидг керг-үүлдврин йовудт мергҗлтнрт бийән үзүлҗ, эмнлһнә туст сүв-селвг авч болхиг медәд, дарунь шинҗллт кев. Күүкд күүнә тоолврар, ямр нег гемиг эртәснь илдкҗ дарунь эмнлһ эклхлә, туста болдгнь лавта.
- Сән авъяст тохрсар, эмчнрин баг хаврар болн намрар таңһчин селәдт одна. Эн керг-үүлдвр Целинн районд эклв. Эмчнрин баг долан хонгин туршарт һурвн районд одад, урднь күрәд уга селәдт одхмн. Муниципальн бүрдәцсин толһачнрла күүндәд, дөң болхин тускар үгцвидн. Эн долан хонгт эмчнрин баг Яшалтан района Яшалта болн Соленое, Октябрьск района Ик Царң, Мирный болн Восход селәдт көдлхмн. Урднь давулгдсн керг-үүлдврмүдин ашар эмчнр ут тоодан 11800 күүнә эрүл-мендин бәәдл шинҗлв. Эн керг-үүлдврин йовудт цергә шишлң керг-үүлдврт орлцачнрт болн теднә өрк-бүлмүдин гешүдт онц оньг тусхагдна. Тиигәд, цергә даалһвран күцәҗ йовдг 70 дәәч болн эднә өрк-бүлин 250 гешүн эмчнрт бийән үзүлв. Райодын эмнлһнд кергтә мергҗлт уга болхла, таңһчин эрүл-менд харлһна бүрдәцсин эмчнр тиигәрән һарч йовна. Тиигәд, О.Шунгаеван нертә нилхд төрлһнә төвин мергҗлтнр Хар Һазра болн Сарпан райодт одхмн гиҗ зуралгдҗана, - гиҗ эмчнрлә хамдан ирсн таңһчин эрүл-менд харлһна министрин селвгч Батыра Зинаида келв.
Ноха сарин 26-д эмчнрин баг Үстин района Цаһан Амн болн Татал селәдт одх болна. Дигтә эн өдр Москваһас Әрәсән терапийин төвин мергҗлтнр мана таңһчд ирҗ, түрүн дөң күрглһнә халх ямр кевәр бүрдәгдсиг шинҗлхмн. Цаһан Амн селәнд района эмнлһнд болн поликлиникд бат ясвр кегдсмн, тегәд шинрүлгдсн бүрдәцст ямаран таал тогтагдсинь хәләһәд, «Эрүл-менд бәәтн!» гидг керг-үүлдврин йовудт медәтнрт, цергә шишлң керг-үүлдврт орлцачнрт ямаран дөң күргҗәхинь орн-нутгин төвин мергҗлтнр шинҗлхмн.

ДООҖАН Наталья
ЗУРГТ: зүркнә эмч Бадмин Анҗа шинҗллт кеҗәнә

Видео