Сурһульчнрт нерәдсн мөргүлмүд

Сегодня, 12:37 | Общество, Таңһчин зәңгс, Зіњг, Бурхн-шаҗна төрәр

Җил болһн сурһулин җил эклхин өмн иим мөргүлмүд кедг сән авъяс Бурхн Багшин Алтн сүмин үүлдврт батрсн бәәнә. Күүкд-көвүд мөргүлд орад, шаҗна хувргудын әдст күртәд, сурһулин җил күцәмҗтә болтха гиҗ зальврна. Эн җил иим мөргүлмүд ноха сарин 23-д болн 30-д болҗана.
Ноха сарин 23-д болсн мөргүлд ик зуудан талдан һазрт сурх баһчуд цуглрҗ ирв. Ода зуг амрлһна цагт Элстд ирҗ, мөргүлд орхан медәд, баһчуд гелңгүдин умшсн ном оньган өгч соңсад, оютнрин җирһлнь цаһан хаалһта болхин туст зальврцхав.
Эн мөргүлд орҗ эс чадсн оютнр болн сурһульчнр ноха сарин 30-д болх мөргүлд орлцҗ чадҗана. Бурхн Багшин Алтн сүмин гелңгүд Манзшрин гегәнә ном умшхмн. Цецн ухана бурхна евәлд күүкд-көвүд багтад, сурһулин җилдән төвкнүн седклтә орхмн.
Сурһуль сурлһнд харш болх тоотыг уурулх номин дару медрл дасч авлһндан һавшун болҗ, седвәр һарһҗ, багшнрин заасн тоотыг арднь орҗ дасад, сурһулин дарани девсңд сәәнәр белдхднь туслх ном бас умшгдхмн.
Эн мөргүлд орлцад, күүкд-көвүд сурһулян сурхд, эрүл-мендән батлхд туслх номин евәлд күртнә.
Давсн амрлһна өдр болсн мөргүлд Элстин баһчудас нань райодас чигн оютнр ирҗ орлцв.
Бурхн Багшин Алтн сүмд дарани иим мөргүл ноха сарин 30-д өрүн 9 часла эклхмн. Сурһулин шин җил цуг сурһульчнрт болн оютнрт күцәмҗтә, байрта-бахмҗта болтха гиҗ хурлын гелңгүд ном умшҗана.

УШКАНА Сувсн

Видео