Эврә кергән делгрүләд

Сегодня, 12:50 | Общество, Таңһчин зәңгс, Зіњг, Селәнә эдл-аху

Олн үртә, баһ тетквртә өрк-бүлмүд социальн бооца батлад, шаңһа дөңгәр тааста кергән делгрүлҗ чадна. Нег үлү эннь селән һазрт бәәдг улст туслна. Октябрьск района Цаһан Нур селәнд бәәдг олн үртә Очра Инҗр (зургт) нидн района әмтнә социальн харслтын цергллтд бооца батлад, һуйрин зүүтә әмтәхн эдл-ууш кеҗ-һардг болв.
Инҗр сурһуль сурчасн цагтан эн кергәр соньмсв. Ямр нег байрла күүкн әмтәхн кегдлмүд кеһәд, өөрхн элгн-садан тоодг бәәсмн. Хәрд һарад, гертксән байрлулсн деерән таньл-үзл улсин сурврар һуйрин зүүтә кегдлмүд болһҗ өгдг билә. Цаһан Нур селәнә бәәтхә, хам-хоша бәәдг Өвдг, Хошуд, Иҗл селәдин әмтнә сурврар әмтәхн хот белддг болв.
Цаг ирвәс иим улсин то өсәд, эдн дунд урмдулгч лотерей давулдг болсна хөөн эврәннь кергән делгрүлхәр социальн бооца батлхар седв. Района әмтнә социальн харслтын цергллтин мергҗлт Батан Эльза дөң-нөкд болад, кергән делгрүлхд ик урмд өгв.
Социальн бооца батлсна хөөн энүнд 350 миңһн арслң дем өггдв. Тер мөңгәр эн беш, киитрүләч, һуйр элддг кергслмүд, ширә болн нань чигн тоот хулдҗ авв. Батыр Николаевич авальнь, арвн негтә Иляна болн йистә Нүүдлә күүкднь Инҗрт нөкд болна. Сул цаг учрхла, цугтан малын хош тал адһна. Дөрвнь үрнь эк-эцкәсн үлгүр авч көдлмшч улс болҗ өсчәнә. Иляна Нүүдлә хойр сурһулян сәәнәр сурна, эдн селәнә сойлын Герт үүлддг «Теегин айс» ансамбльд орна. Санл көвүнь эн җил 1-ч класст орхмн. Отхн Даяна тавта, эн бичкдүдин садт орна.
- Шаңһа дөңгәр тааста кергән делгрүләд, эврән мөңг олҗ олзта-орутаһар көдлҗәнәв. Авальм мал бәрәд, өрк-бүлән теҗәнә. Иргчдән бичкн кафе секәд, әмтн нааран ирәд цә ууһад, әмтәхн хот амсад, цаган сергмҗтәһәр давулхин тускар ухалҗанавидн. Седкл бәәхлә, бооца батлад, тааста кергән делгрүлх кергтә гиҗ Очра Инҗр олн үртә эк-эцкнрлә сүв-селвгәрн хувалцв.

ДООҖАН Наталья

Видео