Тәрәчнрин көдлмшт орлцад.

Сегодня, 13:06 | Общество, Таңһчин зәңгс, Зіњг, Селәнә эдл-аху

Ик Буурла района Приманыч селәнд бәәдг Санчра Екатерина буудя хадһлдг бүрдәцд 1983 җиләс авн көдлҗәнә. Ирх җилд медәт 80 насна өөнән темдглхмн, болв эн эндр күртл көдләд, тәрәчнрин хураҗ авсн буудяг дигтә-даратаһар тоод авч, кергән үнн кевәр күцәҗәнә.
Урднь эднә өрк-бүл Яшкулин районд билә, Борис Купцаевич авальнь тенд «Молодежный» эдл-аху һардҗ йовла. 80-ч җилмүдин эклцәр эдн түрүләд Көвүд селәнүр нүүв, хөөннь Приманыч селәнд нүүҗ ирв. Герин эзн экономистәр, Екатерина Ангриковна болхла буудя хадһлдг бүрдәцд көдлдг болв. Тер цагас авн нег ормдан дөчн һар җилдән көдлҗ йовдг медәтин тускар Приманыч селәнә толһач Хулхачин Баатр бүләнәр келәд, күцәмҗтәһәр көдлҗәхинь темдглв. Бәәрн арһлачнр селәнә әмтнә хүв һазриг нәәмәдлҗ авад, тәрә тәрнә. Урһц хураҗ авгдсна хөөн нег хүв һазрин төлә эднд һурвн тонн буудя өгнә. Тәрәчнр хураҗ авсн буудяг нааран авч ирнә, энд Санчра Екатерина җолач болһн кедү буудя ачсинь тоод авна. Хөөннь селәнә әмтнд тер буудяг түгәҗ өгнә. Кенд кедү буудя өгх кергтәһинь бас Екатерина Ангриковна диглнә. Урднь селәнәхн олар мал бәрдг билә, ода болхла үлү-дутуһинь хулдна.
Бидн Санчра Екатеринала күүндҗәсн цагт дигтә буудя ачхар машин ирв. Энүнә тодлсар, урднь буудя хадһлдг бәәрнд 15 күн хойр селгәнд көдлдг билә. Урһц хуралһна кемд эдн буудяг эд-бод кеһәд, овалад, ирсн машинд ачдг билә. Энд көдлдг улст 5 тонн буудя өгдг бәәсиг эн бас тодлв.
- Урһц хуралһна кем эклхлә нааран көдлмшт һарнав. Эн сара хонг төгстл селәнә әмтнд буудя түгәҗ өгх кергтә. Көдлмшән сәәнәр меднәв, кергән үнн-чик седклтәһәр күцәхәр шуннав. Мана тәрәчнр эн җил элвг урһц хураҗ авснь байрта, - гиҗ Санчра Екатерина темдглв.
Борис Купцаевич болн Екатерина Ангриковна тәвн җилдән хамдан ниитә бәәв. Һундл төрхд, һурвн җил хооран авальнь сәәһән хәәв. Күүнә җирһлд байрлх-зовх саам учрдг, тегәд эдн нег-негән дөңнҗ йовсмн. Хойр көвүнь зеткрлә харһад, әмнәсн хаһцснь эк-эцкднь ямаран ик зовлң болв гиһит. Ода өөрнь бәәдг нег көвүнь болн һурвн ачнь эңкр экдән болн ээҗдән түшг болҗ дөңннә. Нег ачнь цергә нисәч, наадкнь малын эмч болв, отхн ачнь болхла сурһульч мөн. Эдн гертәсн холд йовдг болв чигн өдр болһн җиңнүләд, мендинь меднә, амрлһндан һархларн Екатерина Ангриковнад золһҗ ирнә.
ДООҖАН Наталья
ЗУРГТ: Санчра Екатерина көдлмштән

Видео