Селәнә сурһульчнриг байрлулв

Сегодня, 13:08 | Общество, Таңһчин зәңгс, Зіњг

Эн өдрмүдт мана таңһчд «Бичкдүдиг сурһульд белдхд нөкд болтн!» гидг буйнч седклин керг-үүлдвр давҗана. Олн үртә, баһ тетквртә өрк-бүлмүдин бичкдүдт сурһульднь кергтә эд-тавр, хувц-хунр болн нань чигн кегдлмүд хулдҗ авхин төлә арһлачнр, таңһчин бүрдәцс мөңг һарһҗ эн кергт орлцҗана. «Дари добро» гидг буйнч седклин олна саң җил болһн таңһчин райодын селәдт бәәдг өрк-бүлмүдт демән күргнә.
Шидр эн саңгин һардач Эльза Шамован седвәрәр Целинн района Хар Булг селәнд буйнч седклин керг-үүлдвр давулгдв. Хар Булг селәнә муниципальн бүрдәцин толһачин үүл дааҗадг Оватан Басң, олна залврин ниицәнә (ТОС) гешүд Чабана Хоңһр, Эрднин Анатолий, Элст балһсна Олна палатын ахлач Нарна Виктор, ЭГС-ин депутат болн «Калмыкия» зәңгллһнә агентствин һардач Марила Хоңһр эн седвәриг дөңнв. Дунд сурһулин һардач Халенгинә Надежда эн керг бүрдәһәчнрт ханлтан өргв. Эндрк амр биш цагла хамг юмн өдр болһн гилтә үнтәрҗәнә, тегәд олн үртә болн баһ тетквртә өрк-бүлмүдт баһ биш мөңгн кергтә. Эн керг-үүлдврин йовудт хувц-хунр, һосн-башмг болн нань чигн эд-тавр өңгәр авч болхмн билә.
ТОС-ин бүрдәһәчнр Чабана Хоңһр болн Эрднин Анатолий, селәнә толһачин үүл дааҗадг Оватан Басң эднә селәнә бичкдүдиг дөңнәд иим керг-үүлдвр бүрдәснд Эльза Шамовад ханлтан медүләд, буйнч седклин саңгла цааранднь чигн хамцу үүлдх болв. «Мана саң 13 җилдән үүлдҗәнә, эн җилмүдин туршарт кесг өрк-бүлмүдт дөң-нөкд болвидн. Мана саңгиг дөңндг арһлачнрт ик ханлтта бәәнәв. Райодын толһачнрла күүндәд, селәдин әмтнә төлә олн зүсн эд-тавр бас өгүлнәвидн. Тана селәнд түрүн болҗ ирсмдн эн. Энд олн үртә өрк-бүлмүдин то өсчәхнь байрта. Бичкдүд бәәхлә, дунд сурһуль чигн көдләд, селән делгрх. Бидн дәкәд чигн нааран ирхвидн, мана залһлдан улм батрад бәәх», - гиҗ Эльза Шамова иткүлв.
Күүкд-көвүд эк-эцкнртәһән хамдан ирәд, бийдән хувц, сурһульднь кергтә эд-тавр авв. Тер мет бичкдүдин төлә олн зүсн дегтрмүд авч ирсн билә. Бичкн көвүһән дахулад ирсн Михаил Васильевин келсәр, эн бийнь бәәрн дунд сурһульд сурч йовсмн. Көвүнь эн җил 5-ч класст орҗана. Селәнә сурһулин улд буйнч седклин саң иим керг бүрдәсиг соңсад, көвүндән хувц авхар ирсн болв. Иим керг-үүлдврмүд олн үртә болн баһ тетквртә өрк-бүлмүдт олзта-туста болна гиҗ залу күн темдглв. Нег үлү өрк-бүлд хойр-һурвн сурһульч бәәхлә, эк-эцкнрт баһ биш мөңгн кергтә болна. Сурһулин кем эклхин өмн буйнч седклин саң иим керг-үүлдвр давулад, бичкдүдт ик байр үүдәв гиҗ залу күн йосндан бахтв.
БАТАН Сәәхлә

Видео