Әмтиг үүмүлҗәдг төрмүдәр

Сегодня, 13:13 | Общество, Таңһчин зәңгс, Зіњг

Хальмг Таңһчин эрүл-менд харлһна министрин үүл дааҗадг Мушаран Арслң болн Элст балһсна прокурор Һәрән Баатр П.Жемчуевин нертә таңһчин эмнлһнд одад, әмтиг соньмсулҗадг төрмүдәр цәәлһвр өгв. Таңһчин эмнлһнә ах эмч Чумпинә Саглрин темдглсәр, иим харһлтс олзта-туста болна.
Харһлтын йовудт әмтн олн зүсн шинҗллт келһнә, эмнлһ авлһна болн санаторьт амрх путевкар болн эмәр тетклһнә төрмүд босхв. Дааврта һардачнр әмтиг үүмүлҗәдг сурврмудт тодрха цәәлһвр өгәд, орн-нутгин болн таңһчин закадла ирлцәтәһәр күргдг туслмҗин тускар келҗ өгв. Әмтнәс орҗ ирсн эрлһс онц бүртклһнд авгдв.
Хөөннь Мушаран Арслң болн Һәрән Баатр таңһчин эмнлһнә медицинск реабилитацин әңгд болн дәәнә ветеранмудын госпитальд одад, энд эмнгдҗәдг улсла бас күүндв. Цергә шишлң керг-үүлдврт орлцачнрла болсн харһлтд эднә эрүл-менд батруллһна төр босхгдв. Тер мет бүрдәцд әәмшг уга бәәдл тетклһнә төрәр таңһчин эмнлһнә ах эмчлә бас күүндвр болв.

Видео